ئاڤان فارس جاف:مانشێتیش ژن دەكوژێ
ژن, هەر سینگ و مەمك و چێژ نییە
لاپەڕەی هەر رۆژنامەیەك، گۆڤارێك, بڵاوكراوەیەك, هەڵدەدەیتەوە زۆر بە زەقی هەواڵی توندوتیژی دژ بە ژن دەبینی, بە وێنەیەكی خواستراو لە ئەنتەرنێت یا شێواوی قوربانییەكە، بەبێ رەچاوكردنی هەست و سۆزی خوێنەر و دابی گشتی و مافی مرۆڤ, هەواڵەكە خاڵییە لە هەموو یاساو رێساكانی مرۆڤ, ئەوەی دۆخەكەی ناخۆشتر كردووە, سۆشیال میدیاییە, بەداخەوە لەگەڵ هەر كلیك و كردنەوەی لاپەڕەی فەیسبووكەكەت هوروژمی هەواڵی توندوتیژی و كوشتنی ژن هیچ بۆشاییەك ناهێڵیتەوە.
لەوە كارەساتر راوبۆچوون و سەرەنجەكانی خوێنەرەكانە كە بەبێ گوێدانە ئیتیك و ئەخلاقی میدیایی, میدیای كوردی ئەوەندەی كاری لەسەر شێواندنی وێنەی ژن كردووە, ئەوەندەی خەریكی ئەوەیە كە بەهۆی هەواڵی كوشتنی ژنێك خوێنەر پەیدا بكە نیو هێندە بیری لە خزمەتكردن بەو پرسە نەكردووە، لە روێكەوە ژنی كردۆتە كەرەستەی چێژبەخش لە رێگەی مانشێت و ناونیشانە وروژێنەرەكانی, بۆ بەرزكردنەوەی لایك و زیادكردنی خوێنەرەكانی، ئەوەنە كوێرانە هەواڵی توندوتیژی ژن بڵاودەكاتەوە, وا نیشانی دەدات ئەو قوربانییە بەبێ هۆكار رووبەرووی ئەو دۆخە نەبۆتەوە, پرسیار لە لای خوێنەرەكەی بەجێدەهێڵت, بۆ ئەوەی بەگوێرەی بیروباوەڕی خۆی شیبكاتەوە، راگەیاندنی كوردی ئەم چەند ساڵەی رابردوو بەهۆی زیادبوونی بەبێ مەرجی قورس و رێنمایی تایبەت هەروەها نەبوونی چاودێری سەردەمی بۆ میدیا, یەكێكیترە لە هۆكارەكانی گەشەكردنی ئەو نابەرپرسیارێتییەی بەرامبەر بە ژن لە میدیا دەكرێت.
سەرەرای دەنگی ناڕەزایی بەشێك لە میدیاكارانی ژن بۆ ئەو پرسە, واژووكردنی پەیاینامە لەلایەن میدیاكان, بەڵام دەرئەنجام نابینرێ رۆژ لە دوای رۆژ دۆخەكە زیاتر ئاڵۆز دەبێت, ئەركی كێیە بەر بەو دۆخە بگرێت, پرسیارێكە لە خۆمەوە دەستی پێدەكەم بۆ هاوپیشەكانی دیكەم, بۆچی لە ساتی داڕشتنی هەواڵ و كاری میدیایی هەر بیر لە رێژەی خوێنەر و سەرەنج راكیشی دەكەینەوە, بۆچی بۆ خزمەتكردن بە مرۆڤایەتی كارناكەین؟ ئایا بۆچی داڕشتنی هەواڵی زەق و سەرەنج راكێش و وروژێنەر بۆتە نەخۆشی یان لەژێر فشاری سەرنوسەر و سیاسەتی دەزگاكە دەكرێت؟!
بۆچی ئەركە سەرەكییەكەی میدیا لە بیركراوە؟ كە خزمەتكردنە بە تاكەكان و گواستنەوەی زاینارییە, بۆچی دەبێت ژن و جەستەی ببێتە مانشێتی وروژێنەر و بیر لەلایەنە مرۆڤایەتییەكە نەكەینەوە؟!
ئەگەر ژن و جەستەی لە میدیا بهێنرێتە دەرەوە چی بۆ میدیا نابەپرس دەمێنێـتەوە, ئایا ژن هەر سنگ و مەمك و سمت و چێژە؟! بۆچی بیر لە گۆشەی جیاوازی كاركردن ناكرێتەوە, چ ئایدۆلۆژییایەكە پەرە بەو دۆخە ترسناك و نامیدیاییە دەدات, تۆی رۆژنامەنووس ئەگەر میدیا هەر بەو جۆرە دەبینی كە ژن بكەیتە كەرەستەی زیادكردنی خوێنەر و بینەرەكانت, هیچ گۆشە و ئاڕاستەیەكی دیكە نابینیت, بۆچی بیر لە وازهێنان لەو بوارە ناكەیتەوە, بواری دیكە زۆرن بۆ كاركردن.
وەزارەتی رۆشنبیری و سەندیكای رۆژنامەنووسان و ناوەندەكانی پەیوەندیدار بەو پرسە چییان كردووە، بۆ بەرگرتن لەو دۆخە, ئایا تەنیا بیر لە پێدانی مۆڵەت دەكەنەوە, هیچ كاتێك دەزگایەكی میدیاییان داخستوەو بەدواداچوونیان كردووە كە میدیا لە ئاست ژن بۆچی هێندە نابەرپرسە, بۆچی ژن بووە بە هۆكاری بەرزكردنەوەی بینەر و خوێنەرەكانی بەو شێوە نەرێنی و خراپە, یان ئەوانیش خۆیان بینەر و خوێنەر گشتییەكەن و لایك و كۆمێنت بۆ ئەو جۆرە هەواڵانە دەكەن.
لە میانەی كاركردنم بەشداری خولێكی پەرەپێدانی پەیامنێری دەزگاكانی راگەیاندن بووم، بۆ میدیا و پرسی جێندەر كە لەلایەن دەزگایەكی بیانی كرابوویەوە, بەشێكی زۆری دەزگاكان پەیامنێرە پیاوەكانیان ناردبوو, ئەوە بەلای منەوە ئاساییە چونكە كاركردن لەسەر پرسێك بە رەگەز ناگۆڕێت و لە زۆر روەوە لەگەڵ جیاكاری نەبوومە لە بواری میدیا, مەرج نییە هەر پەیامنێرێكی ژن كار بۆ پرسی ژن بكە, بەڵام ئەوەی جێگەی سەرسوڕمان بوو, هیچ كام لە رۆژنامەنووسە پیاوەكان بڕواییان بە پرسی ژن نەبوو, بەڵكوو لە بەشێكی خولەكە ئێمەیان تۆمەتبار كرد بەوەی ئەو بابەتەمان گەورەتر كردووە لە ئاستی خۆی, بۆ بەرژەوەندیی خۆدییی بەكارمان هێناوە.
رۆژ دێـت و دەڕوا, بابەتی ناشیرین و قێزەونتر دەبینم لە میدیا كە تەنیا ژن تێدا قوربانی نییە بەڵكوو بەشێك لە خوێنەر و بینەرەكانیش قوربانبن.
مانشێت و هەواڵە بێ بنەماو سەرچاوە و داڕشتنە خراپ و میزاژییەكان یەكێكیترە لە هۆكارەكانی زیادبوونی تووندوتیژی و بەقەد كلتوور و نەریت و پیاوسالاری هۆكارە بۆ كوشتنی ژن.
