توێژینەوەیەکی بەریتانی ئاشکرایکردووە، گۆرانیوتن و موزیك ژەنین لە شوێنی کارکردندا کاریگەریی باش و ئەرێنی لەسەر کارمەندەکانی ئەو شوێنە دەبێت و وادەکات لە دڵەڕاوکێ و ماندووبوون ڕزگارییان ببێت.
لە بابەتێکی ماڵپەڕی ئێم تی ڤیدا ئاماژە بەوەکراوە، کۆمەڵێك لە توێژەران لە زانکۆی “لیستەر”ی بەریتانیا توێژینەوەیان لەبارەی سوودەکانی گۆرانیوتن و موزیك ژەنین لە کاتی کارکردندا کردووە، چەند سوودێکی ئەم جۆرە چالاکییەیان خستووەتەڕوو:
– %٩٦ی بەشداربووەکان هەستییان بە حەوانەوە کرد پاش گۆرانیوتن و موزیك ژەنین، هەروەها لە نیشانەکانی دڵەڕاوکێ و دوودڵ و خەمۆکی ڕزگارییان بوو.
– %٨٦ی کارمەندەکان ڕزگارییان بوو لە هەستی تەنهایی لە ناو گروپی کارکردنەکەیاندا.
– وایکرد هەست بە دڵخۆشیی و ئارامی زیاتر بکەن.
– لێدانی دڵ و هەناسەدانیان جێگیربوو.
هەروەها زانایان دڵنیایی ئەوەیان داوە کە دەبێت خاوەنکارەکان هانی کارمەندەکانیان بدەن کە لە چالاکییە موزیکییەکان و گۆرانیوتندا بەشداری بکەن لە کاتی کارکردندا، بە مەبەستی باشتربوونی حاڵەتی دەروونییان و چالاکبوونی مێشك و جەستەیان لە کاتی کارکردندا، کە ئەمەش وادەکات بڕی قازانجی ئەو شوێنە زیاتربێت.