رزگار عومەر:دوای سی ساڵ؛ یەكەمجارە پاڵەوانیەتیەكی فەرمی لەعێراق سازدەكرێ، پاش ئەوەی یەكێتی تۆپی نێودەوڵەتی گەمارۆی لەسەر یاریگا وەرزشییەكانی عێراق لابردو یارییەكانی پاڵەوانیەتی وڵاتانی رۆژئاوای ئاسیا لەشاری كەربەلا دەستی پێکرد. رێورەسمی دەست پێکردنی پاڵەوانیەتەکە چەند بڕگەیەکی تێدابوو لەوانە؛
ئاوازژەنینی سرودی نیشتمانی عێراق لەلایەن كەمانچەژەنێكی ناوداری لوبنانیەوە پاشان لەسەر بنەمای چیرۆكەكانی هەزارو یەك شەوی شەهرەزاد چەند تابلۆیەكی سەما لەلایەن ژمارەیەك كچەوە پێشكەش كران.
ئەم ڕێوڕەسمە؛ مالكی‌و پیاوانی ئایینی شیعەی توڕە كردوە. نوری مالكی، سەرۆك وەزیرانی پێشوی عێراق‌و ئەمینداری گشتی حزبی دەعوەی ئیسلامی، یەكێك بو لەدیاریترین ئەو كەسانە، كە لەبەیاننامەیەكدا ناڕەزایی خۆی بەرامبەر بەو رێورەسمە دەربڕی‌و ئیدانەی كرد. بەڵام لەبەرامبەریشدا، لەتۆڕەکانی سۆشیال میدیادا بەشێكی زۆر لەعێراقیەكان پشتیوانی خۆیان بۆ ئەو رێورەسمە دەربڕی، لەرێگەی دو هاشتاگی “كەربەلا، قەندەهار نییە”و “سەماكەر لەدز باشترە”.
موفارەقەی ئەوەی ڕوودەدات بەریەك کەوتنی سیاسەت و کلتورە، گەڕانەوەی، یان بەرەنگاری نوزەکانی روخسارەکانی مۆدێرنەیە لە درزێکی تەنگەبەرو نەفس بڕدا کە دوولا لە فەزایەکی بێ بەلانسدا لە فەازیەکی نیوە ڕاست و نیوە رەمزیدا دەیانەوێ دەسکەوتی زیاتر لە یەکتر بستێنن؛ لایەکیان بریتیە لە : جەماوەرێکی تینووی کلتورێکی ئاسانترو کراوەترە، لایەکەیتر بریتیە لە توێژێکی ئاینی – سیاسی کە تینووی فاشیزمی زیاترە.
ئەوەی کەمانجە ژەنەکە عەزفی کرد سرودی نیشتیمانیی عێراق بوو، ئەو هات و دوو دەستی لە دوو حەرام دا، یەکەمیان/ سروشتی جموجۆڵی ئافرەتێکی کەمانجە ژەنێکی زۆر ئاسایی بێ سەرپۆش نیشان دا لەوێ لە “کەربەلا” کە پیاوانی ئاینی و ئیسلامی سیاسی خەریکی بنیات نان و تیژکردنەوەی سیستەمێکن کە بە ئاسانی و بێ موشکیلە دەتوانین ناوی لێ بنێین کۆپی ئێران. دووەمیان/ سرودی نیشتیمانی عێراق لە کەمانجەیەك دەرچوو “مێینەیە”و هیچ روخسارێکی میلتاریستی و میلیشیایی و ئاینی و “نێرینە”یی پێوەدیار نەبوو، هەموو جەماوەرەکەش هاوسۆزبوون، ئەمە ڕەنگە هەڕەشەیەکی سیاسی نەبێت، بەڵام بە دڵنیایی هەڕەشەیەکی ڕەمزی قوڵ بوو.ئەم هاوسۆزیە پێچەوانەی ویستی ئەو “سیاسەتەیە” کە هەندەسەی خەفە کردنی جۆرێك لە “مۆدێرنەیە” کە خۆی مۆدێرنە لە بنچینەدا پڕۆسەیەکە هەر لە بناغەوە گەیشتنی بە عێراق تەواو نەکرد. جارێ لە ڕوخساری چەند ڕێفۆرمێکی کاتیی خۆی نواند (نموونەی ئەزمونی چوارساڵەی عبدالکریم قاسم) جارێك وەکو کلتورێکی خۆڕانەگر بەرامبەر بە هەڵسانەوەو هەژموونی ئاینگەرایی و شەقاربوونی جومگەکانی نیمچە “کۆمەڵگە” بە دەستی گەمارۆ ئابوریەکان و جەنگەکان.
مۆدێرنە لە ئێستای عێراقدا لە شەبەحێكی تاك و تەرا دەچێت، هێزێکی واقیعی کۆمەڵایەتی دەوێ ببێ بە ئەفسانەیەکی سیاسی، ببێ ئەفسانەیەکی کلتوری دەستی ئەم شەبەحە بگرێ و ئێرە بکات بە ماڵی هەمیشەیی ئەو.
زانیاری زیاتر لەم لینکەدا ببینە و بخوێنەرەوە
