بۆ د. هوشیار
عەزیز ڕەئووف:
مایەی شۆك نیە عەزیزان، كە مەرگی عەزیزێكمان دەبیستین، مایەی شۆك نیە دۆستان، كە خوێنێكی تر دەبینین، زۆر ئاساییە هاوڕێیان، كە وەك قوربانی بەرانێكی ترمان دەبەن بۆ بەردەم چەقۆی جەلاد. یەكەمجار نیە ئازیزان كە بەیانیان هەڵدەسین و وێنەی فریشتەیەكی تر دەبینین كە باڵەكانی شكاوە، یەكەمجار نیە خزمان، كە بەیانیەك هەڵدەسین و وێنەی پرۆفایلی برادەرانمان كراوە بە وێنەی شەهیدێك، ئەمە خوێنێكە ناوەستێت، ئەمە مەرگێكە یەك یەك هەموومان لەگەڵ خۆیدا دەبات.
كێیە توشی شۆك بووە بەم مەرگە؟ سەردەشت و سۆران و كاوە و ویدادیان برد هەر ئەوەمان كرد كە ئێستا ئەنجامی دەدەین، چەند ڕۆژێك وێنەی پرۆفایلەكان دەگۆڕین و دەنگ بەرز دەكەینەوە و لە میدیاكانەوە قسە دەكەین و پاش هەفتەیەك هەموو دەچینەوە قاوغەكەی خۆمان. ئەوە كێیە ئەوەندە ناسكە دەڵێی خوێنی نەبینیوە و بە مەرگی د. هۆشیار خەمبارە؟ ئەوە كێیە زوو زوو خوێنی بیر دەچێتەوە و وا دەزانێـت ئەوە یەكەمجارە خوێن دەڕژێت؟ عەزیزان ئەمە ڕەشمارێكە تا هەموومان ژەهراوی نەكات واز ناهێنێت، زیڕە لە یەك یەكەمان هەڵنەسێنێت دەسبەرداری خوێنمژین نابێت.
ڕەشمارێك تا ئێستاش بە هیوای دنیات بۆ باشتر بكات، بەم هەموو هێزە نەتوانرا ئەم خوێنە بوەستێنرێت، وەك كەروێشك وەستاوی لەبەردەم هەڵمەتی تاژی، وەك ئاسك وەستاوی لەبەردەم كەڵبەی پڵنگێكی برسی، دەتەوێ هیچ ڕوو نەدات؟
دۆستان، كە بارەگا لە بادینان سوتا و چوار كەس شەهید بوون سوڵحی عەشایەری دەكەی، ئێستاش دەتەوێ لەگەڵ مار سیاسیەتی میانڕەوی جێبەجێ بكەی، چۆن لەبەردەم شەیتان وەك فریشتە سیاسەت دەكرێت؟ چۆن لەبەردەم گورگێكی برسی دەتەوێـت مەڕ بیت و لەیەك ماڵیشدا بژیت و گورگ نەتخوات؟ دۆستان خوێن سحرێكی سەیرە كە ڕژا ناوەستێ، ئەوەی خوێن بڕێژێ درۆیەكی گەورەیە ژیانت باش بكات، ئەوەی كەڵبەكانی بشارێتەوە، نوكتەیە پێت وابێت فریشتەیە، ئەم گوركە مێژوویەكی دوورو درێژی هەیە لە خوێن و خیانەت، شوێنپێی لەسەر سنورەكان دیارە كە چەند جار گەلەگوركی دراوسێی هێناوەتە ئەم باخچەیە، ئێستاش كە پەیامێك بڵاو دەكاتەوە، یەكەم كەسی پێشوازی لە پەیامەكەی دەكەی؟ كەس هەیە لە دنیا بە قسەی گورگ دڵخۆش بێت، بە بەڵێنی شەیتان فریو بخوات؟ عەزیزان، دەبێت زیاد لە خوێنێكی تر و زیاد لە قوربانیەكی تر حیساب بكەیت.
ئەم دۆخە ئاوا بڕوات، سەرباری گوێبیستی گریانی منداڵی برسی، دڵنیام زیاد لە بەیانیەك دەبینین، كە عەزیزێكمان لەدەست داوە، زیاد لە خۆرئاوابوونێك دەبینین كە ڕەشمارێك فریشتەیەكی ژەهراوی كردووە.
ئەم دەستە هی ئەوە نیە دانیشی لەگەڵی، هی ئەوە نیە دڵخۆش بیت بە پەیامەكانی و تۆپ فڕێبداتە قاچی ئەوانی تر و موچەی فەرمانبەران باش بكات، بەڵكو مەخلوقێكە توشی نەخۆشی دەرونی بووە، دەبێت بیگریت و لە نەخۆشخانەیەكی دەرونی بەندی بكەی، نەیەڵی بەربێت، بەربێت یان دزی دەكا یان خیانەت، یان خوێن دەڕێژێت، بەربێت بەسەر شەقامەكاندا بەڕاست و بەچەپدا بە دەمارچەكەی تەقە دەكا. ئەم مەخلوقە هەموو دەورەوبەری توشی ڤایرۆس كردووە، ئەوەی توشی ڤایرۆسیش نەبێت، دەیانكوژێت. بۆیە مەحاڵە بتوانی لەگەڵ نەخۆشێكی دەرونی سیاسەت بكەیت، نەخۆشێك ئەوانی تریشی توشی نەخۆشی بێدەنگی و سەركرزی و ڕازیبوون بە پاكێج و پەیام كردووە.
مایەی شۆك نیە عەزیزان، بەیانیەك هەڵسین و مەرگی پیاوێكی ئاینی، ڕۆژنامەنوسێك، خوێندكارێكی ژیكەڵە، خوێنی فریشتەیەك ببینین.
