رۆژی دووشەممە، ٢٨ى ئەیلول ساڵى خوێندنى ٢٠١٥ و ٢٠١٦ لە هەر سێ کانتۆنەکەى ڕۆژائاواى کوردستان دەستیپێکرد و پرتوکى نوێى خوێندنیش بە سەر خوێندکاراندا دابەش کرا و خوێندنگەش بۆ پێکهاتەى سریانى و عەرەبیش کراوەتەوە.
ئاژانسى هەواڵى هاوار بڵاویکردووەتەوە، ئەمڕۆ ٢٨ى ئەیلولى ٢٠١٥ دەستەى پەروەردەى کانتۆنى جزیرە پێداویستیى خوێندن و کتێبى کوردیى بەسەر خوێندکاراندا دابەش کردوو. خوێندکاران لە پاڵ زمانى کوردیدا، زمانى ئینگلیزى و عەرەبیش دەخوێنن.
لە شارى عامودێ ١٥ هەزار و ٧٦٠ پرتوکێ نوێ بەسەر ١٠ خوێندنگەى ناوشار و ٦٠ خوێندنگەى گوندەکاندا بۆ قۆناغى سەرەتایى، ناوەندى و ئامادەیى دابەشکراوە.
لە شارى دێرکیش ١٠٩ خوێندنگە دەرگایان بە ڕووى ١٥ هەزار و ٤٤٢ خوێندکار لە هەر سێ قۆناغى خوێندنى سەرەتایى، ناوەندەى و ئامادەیى کردووەتەوە و تاوەکو ئێستاش پرتوکى نوێ بەسەر ٨٢ خوێندنگەدا دابەش کراوە.
٢٩ى ئەیلولیش لە شارى حەسەکە دابەشکردنى پرتوکى نوێ بەسەر خوێندکاراندا دەستپێدەکات.
هاوکات دەرگاى خوێندنگەى تایبەت بە ڕووى پێکهاتەکانى سریانى و عەرەب لە کانتۆنى جزیرەدا کراوەتەوە.
لە کانتۆنى عفرینیش ٣٠٠ خوێندنگە دەرگایان بە ڕووى ٤١ هەزار خوێندکار لە قۆناغەکانى سەرەتایى، ناوەندى و ئامادەیدا کردووەتەوە.
دەستەى پەروەردەى کانتۆنى عفرین ڕاگەیاند، جگە لەو ٣٠٠ خوێندنگەیە حەوت پەیمانگەش لە بوارەکانى مێژوو، زمان و ئەدەبى کوردى بەڕووى خوێندکاراندا دەکرێنەوە.
کانتۆنى جزیرە لە ٢٢ى کانونى دووەمى ٢٠١٤ و کانتۆنى کۆبانێ لە ٢٧ى کانونى دووەمى ٢٠١٤ و کانتۆنى عفرینیش لە ٢٩ى کانووى دووەمى ٢٠١٤دا دامەزراندنى خۆیان لە ڕۆژئاواى کوردستان ڕاگەیاند.
