چۆن یه‌کی ئایار، بوو به‌ رۆژی جیهانیی کریکاران؟

ئاماده‌کردنی: شه‌ماڵ علی

یەکی ئایار، ڕۆژی هاوپشتی جیهانی چینی کرێکار، سه‌ره‌ڕای زۆر لایه‌نی ڕەمزی خۆی بیرهێنه‌ره‌وه‌ی مێژوی خه‌باتی چینی کرێکاره‌ له‌سه‌رتاسه‌ری دنیادا. ئه‌گه‌ر هیچ ڕاستیه‌ک نه‌مێنێت دڕنده‌یی سه‌رمایه‌داریی‌و چینی بۆرژواو پارێزه‌رانی ئه‌م سیسته‌مه‌ پێچه‌وانه‌یه‌ بسه‌لمێنێت، ته‌نها مێژوی یه‌کی ئایار‌و ئه‌و ڕووداوه‌ مێژووییانه‌ی که‌وتوونه‌ته‌ پشتسه‌ری دیاریکردنی ئه‌م ڕۆژه‌ وه‌ک ڕۆژی کرێکار، بەسە بۆ ئەوەی هه‌موو ئه‌و پروپاگه‌نده‌ بێبنه‌مایانه‌ له‌سه‌ر ئازادی له‌ سایه‌ی سیسته‌می سه‌رمایه‌داری‌و دیموکراسیدا پووچه‌ڵ بکاته‌وه‌.

ڕۆژی یه‌کی ئایار وه‌ک ڕۆژێک بۆ چینی کرێکار له ‌میژودا په‌یوه‌سته‌ به‌ خه‌باتی کرێکارانەوه‌ بۆ دیاریکردنی ڕۆژکار به‌ هه‌شت سه‌عات کار. ئه‌م ڕۆژه‌ لەسەدەی نۆزدە‌‌وه‌ له‌ ئه‌مریکا له‌ په‌یوه‌ند به‌و خه‌باتەوە کراوه‌ به‌ ڕۆژی پشوو. تێکۆشان بۆ دیاریکردنی ڕۆژکار به‌ هه‌شت سه‌عات له‌ ساڵی ١٨٦٠ەوه‌ له‌ ئه‌مریکا ده‌ستی پێکردووه‌. له‌ ساڵی ١٨٨٤دا فیدراسیۆنی سه‌ندیکا‌و یه‌کێتیه‌ کرێکاریه‌ ڕیکخراوه‌کان له‌ ووڵاته‌ یه‌گرتووه‌کان‌‌و که‌نه‌دا که‌ له‌ساڵی ١٨٨١ ەوە پێکهاتووه‌‌و (له‌ ١٨٨٦ به‌ دوواوه‌ ناوه‌که‌ی گۆڕاوه‌ بۆ فیدراسیۆنی ئه‌مریکایی کار) بڕیارێکی ده‌رکرد که‌ له‌ به‌شێکیدا‌ ده‌ڵێت:( له‌ یه‌کی ئایاری ١٨٨٦ به‌دوواوه‌ ده‌بێ هه‌شت سه‌عات کار ڕۆژکاری یاسایی پێکبهێنێت، بانگه‌وازی هه‌موو ڕێکخراوه‌ کرێکاریه‌کانی ئه‌م ناوچه‌یه‌ ده‌که‌ین که‌ یاساکان به‌ جۆرێک ئاراسته‌ بکه‌ن که‌ له‌گه‌ڵ ئه‌م بڕیاره‌دا بێته‌وه‌). ساڵی پاش ئه‌وه‌ش هه‌مان فیدراسیۆن به‌یانێکی بڵاوکرده‌وه‌‌و ته‌ئکیدی کرده‌وه‌ که‌ سیسته‌می هه‌شت سه‌عات کار ده‌بێ له ١ی ئایاری ١٨٨٦ەوە بخرێته‌ کاره‌وه‌. له‌به‌رئه‌وه‌ی له‌و سه‌رده‌مه‌دا له‌ ئه‌مریکا کرێکاران ناچار ده‌کران ١٠ و ١٢ و ته‌نانه‌ت ١٤ سه‌عات کار بکه‌ن. جووڵانه‌وه‌ی هه‌شت-سه‌عات کار زۆر به‌ خێرایی فراوان بووه‌وه‌. له‌ چه‌ند مانگ به‌ر له‌ ڕۆژی دیاریکراوەوە (واتە ١ی ئایاری ١٨٨٦)‌ هه‌زاران کرێکار، ڕێکخراو و ناڕێکخراو، هاتنه‌ مه‌یدانی خه‌باته‌وه‌. شاری شیکاگۆ له‌ ویلایه‌تی ئیلینۆی ناوه‌ندی خه‌بات‌و ڕوبه‌ڕوبوونه‌وه‌ له‌ پێناوی ڕۆژکاری کورتتر بوو. یه‌کێتی ناوه‌ندیی کار له‌ شیکاگۆ ڕابه‌رایه‌تی ئه‌م جووڵانه‌وه‌یه‌ی ده‌کرد که‌ پێکهاتبوو له‌ 22 یه‌کێتی‌و ریکخراوی کریکاری.

له‌ کاتی مانگرتنی کریکارانی هێڵی ئاسن له‌ ساڵی ١٨٧٧، کرێکاران له‌لایه‌ن پۆلیس‌و سوپای ئه‌مریکاوه‌‌ به‌ شێوه‌یه‌کی توند‌وتیژ هێرشیان کرایه‌ سه‌ر‌. هه‌مان تاکتیکی تۆقاندن له‌لایه‌ن ده‌سته‌‌ودایره‌ی حکومه‌ته‌وه‌ ئاماده‌کرابوو بۆ ڕوبه‌ڕو وه‌ستانه‌وه‌ی جووڵانه‌وه‌ی هه‌شت-سه‌عات کار. پۆلیس‌ و پاسه‌وانی نیشتیمانی ژماره‌یان زیادکرابوو، به‌ پاره‌ی سه‌رکرده‌ی خاوه‌ن سه‌رمایه‌کان له‌ ناوچه‌که‌دا چه‌کی نوێ‌ و به‌هێزیان بۆ فه‌راهه‌مکرابوو. هه‌رچۆن بێت، تاکو یه‌کی ئایار جووڵانه‌وه‌که‌ کۆمه‌ڵێک ده‌ستکه‌وتی باشی بۆ زۆربه‌ی کرێکارانی شیکاگۆ به‌ده‌ستهێنابوو. به‌ڵام له‌ ٣ ئایاری ١٨٨٦ که‌ هێشتا له‌ هه‌ندیک شوێن مانگرتن به‌رده‌وام بوو بۆ به‌دیهێنانی خواستی هه‌شت سه‌عات کار، له‌ کۆمپانیایه‌ک به‌ ناوی ماکۆرمیک پۆلیس ته‌قه‌ی له‌ مانگرتنی کرێکاران کردبوو و‌ لانی که‌م کرێکارێک کوژرابوو و پینجی تر به‌ خه‌ستی‌و ژماره‌یه‌کی نه‌زانراو به‌ سووکی بریندار کرابوون. بۆ ڕۆژی دوایی، به‌ مه‌به‌ستی ناڕه‌زایی ده‌ربڕین به‌رانبه‌ر ئه‌و په‌لاماره‌ دڕندانه‌یه، بانگه‌وازی میتینگێکی کرێکاریی له‌ مه‌یدانی هه‌یمارکێت ‌له‌ شاری شیکاگۆ ده‌کرێت.

میتینگه‌که‌ به‌ شێوه‌یه‌کی ئارام به‌رپا ده‌کرێت‌و نزیکه‌ ته‌واو بوون ده‌بێت. کاتێک دوا قسه‌که‌ر له‌سه‌ر مینبه‌ر ده‌بێ‌ کۆبوونه‌وه‌که‌ به‌ هۆی بارانی زۆره‌وه‌ که‌م ده‌بێته‌وه‌‌و ته‌نها ٢٠٠ که‌س له‌ مه‌یدانه‌که‌دا ده‌مێنن‌. له‌و کاته‌دا هێزێکی پۆلیس که‌ برێتی ده‌بێ‌ له‌ ١٨٠  پۆلیس ده‌ڕژێنه‌ مه‌یدانه‌که‌‌و فه‌رمان ده‌ده‌ن‌ که‌ ده‌بێ میتینگه‌که‌ بڵاوه‌ی لێ بکرێت‌و ده‌که‌ونه‌ ئازاردانی کرێکاران. له‌ کۆتایی میتینگه‌که‌دا بۆمبێک، له‌ لایه‌ن نه‌ناسراوێکه‌وه‌ (تا ئێستاش نه‌زانراوه‌ کێ بووه‌) فڕێ ده‌درێته‌‌ ناو پۆلیسه‌کانه‌وه‌‌و پۆلیسێک ده‌کوژرێت‌و شه‌ش پۆلیسی تر به‌ خه‌ستی بریندار ده‌بن‌. له‌ پاش ئه‌وه‌ پۆلیس ته‌قه له‌ کرێکاران ده‌که‌ن ‌‌‌و ژماره‌یه‌کیان لێ ده‌کوژن‌و بریندار ده‌که‌ن(تا ئێستاش به‌ شێوه‌یه‌کی دیاریکراو ڕانه‌گه‌ینراوه‌ که‌ چه‌ند سیڤیل به‌ ده‌ستی پۆلیس کوژراون). ئه‌گه‌رچی هه‌رگیز ئه‌وه‌ ئاشکرا نابێت‌ که‌ کێ بۆمبی فڕێداوه‌ته‌ نێو پۆلیسه‌کانه‌وه‌و ئایا به‌ڕاستی ئه‌و بۆمبه‌ له‌ نێو کرێکارانه‌وه‌ فڕێ دراوه‌ یان نا‌، به‌ڵام ده‌سه‌ڵاتداران ئه‌م ڕوداوه‌ ده‌که‌نه‌‌ بیانوی په‌لامارێکی هه‌مه‌لایه‌نه‌ بۆ ده‌ستگیرکردنی ڕابه‌رانی کرێکاریی‌.

پۆلیس په‌لاماری ماڵی کرێکاران‌و ئۆفیسی یه‌کێتیه‌ کرێکاریه‌کانی ده‌ده‌ن‌‌و سه‌دان کرێکار بەبێ هیچ تۆمه‌تێک ده‌ستگیر ده‌که‌ن‌. فه‌زایه‌کی پۆلیسی تۆقێنه‌ر له‌ شاری شیکاگۆدا به‌رپا ده‌کرێت‌. دادوه‌ری ده‌وڵه‌تیی ئه‌و وه‌خته‌ فه‌رمان به‌ پۆلیس ده‌دات‌ که:‌ (په‌لاماره‌کانتان ته‌واو بکه‌ن‌و پاشان سه‌یری یاساکان بکه‌ن!)

سه‌ره‌نجام به‌بێ هیچ به‌ڵگه‌یه‌کی سه‌لمێندراو، له‌ دادگایه‌کی بێسه‌ره‌وبه‌ردا، حه‌وت که‌س له‌ ڕابه‌رانی کرێکاریی به‌ تۆمه‌تی پیلانگێڕان بۆ کوشتنی پۆلیس به‌ ئیعدام‌و که‌سێکیان به‌ ناوی ئۆسکار نیب به ١٥ ساڵ زیندان حوکم ده‌کرێن‌‌. له ١١ی نۆڤه‌مبه‌ری ١٨٨٧دا چوار له‌و ڕابه‌رانه‌ به‌ ناوی ئه‌لبێرت پارسۆنس، ئه‌دۆلف فیشه‌ر، ئۆگۆست سپایس‌و جۆرج ئینجل به‌ هه‌ڵواسین ئیعدام ده‌کرێن‌و لویس لینگ له‌ زینداندا خۆی ده‌کوژێت‌. ده‌سه‌ڵاتداران ته‌رمه‌کانیان ڕاده‌ستی هاوڕێیانیان ده‌که‌نه‌وه‌‌ که‌ له‌ ڕی‌و ڕه‌سمێکی بێ وێنه‌دا (که‌ به‌ پێی سه‌رچاوه‌ جۆربه‌جۆره‌کان ژماره‌ی به‌شداربووانی له‌ نێوان ١٥٠ هه‌زار تاکو ٥٠٠ هه‌زار که‌س بووه)‌ به‌ خاک ده‌سپێردرێن. له ‌٢٥ی جون(حوزه‌یرانی) ١٨٩٣ له‌ گۆڕستانی والهایم په‌رده‌ له‌سه‌ر مۆنومێنتی کرێکارانی گیانبه‌ختکردوی هه‌یمارکێت لاده‌درێت. باقی ده‌ستگیرکراوه‌کان که‌ برێتین له‌ سامۆئیل فێلدن، ئۆسکار نیب‌و مایکل شواب سه‌ره‌نجام پاش نۆ ساڵ زیندانی بێ پاساو له‌ ١٨٩٣ ئازاد ده‌کرێن.

له ٢٥ی جون (حوزه‌یرانی) ١٨٩٣ حاکمی ویلایه‌تی ئیلینۆی جۆن پیته‌ر ئه‌لتگیلد، بڕیاری لیبوردنێک له‌و زیندانیانه‌ ده‌رده‌کات که‌ تیایدا ده‌ڵێت که‌ ئه‌و نه‌ک له‌به‌رئه‌وه‌ی زیندانیه‌کان به‌ ڕاده‌ی پێویست له‌ زینداندا ئه‌زیه‌ت‌و ئازاریان چه‌شتووه‌، به‌ڵکو زۆر به‌ ساده‌یی له‌به‌ر ئه‌وه‌ی بێ تاوانن‌ سه‌باره‌ت به‌و تۆمه‌تانه‌ی دراوه‌ته‌ پاڵیان ئازاد ده‌کرێن. ئه‌و هه‌روا ڕایده‌گه‌یه‌نێت که‌ ئه‌م زیندانیانه‌‌و ئه‌وانه‌ی که‌ ئیعدامیش کراون قوربانی هیستیریا، ده‌سته‌یه‌ک ژوریستی(دادپرسی دادگا) به‌ مەبەستەوە دیاریکراو ‌و دادوه‌رێکی ناعادیل بوون. حاکمی ویلایه‌تی ئیلینۆی ئه‌وه‌ ئاشکرا ده‌کات که‌ تۆمه‌تباران تۆمه‌ته‌کانیان نه‌سه‌لمێنراوه‌‌و ده‌وڵه‌ت “هه‌رگیز بۆی ئاشکرا نه‌کراوه‌ که‌ کێ ئه‌و بۆمبه‌ی فڕیداوه‌‌ که‌ پۆلیسه‌که‌ی کوشتووه‌، به‌ڵگه‌کان هیچ ئاماژه‌یه‌ک بۆ ئه‌وه‌ ناکه‌ن که‌ په‌یوه‌ندیه‌ک له‌ نێوان تۆمه‌تباران‌و ئه‌و که‌سه‌دا هه‌یه‌ که‌ بۆمبه‌که‌ی فڕێداوه‌“

به‌م جۆره‌ خودی سه‌رانی ده‌وڵه‌ت په‌رده‌ له‌سه‌ر ئه‌و پیلانه‌ هه‌مه‌لایه‌نه‌یه‌ بۆ سه‌رکوتکردنی کرێکاران‌و له‌ خوێنهه‌ڵکێشانی ناڕه‌زاییه‌ ڕه‌واکانیان بۆ خواسته‌کانیان هه‌ڵده‌ماڵن. شایانی باسه‌ که‌ پیلانی له‌ خوێنهه‌ڵکێشانی جوڵانه‌وه‌ی چینی کرێکار له‌ ئه‌مریکا ته‌نها له‌لایه‌ن کاربه‌ده‌ستانی ده‌وڵه‌ته‌وه‌ دانه‌ڕێژراوه‌‌و جێبه‌جێ نه‌کراوه‌، به‌ڵکو قه‌ڵه‌مبه‌ده‌ستانی بۆرژوا‌و میدیای نۆکه‌ر ده‌ورێکی گه‌وره‌یان له‌ ده‌رکردنی بڕیاری ئیعدامی ڕابه‌رانی کرێکاریی‌‌ و جێبه‌جێکردنی بینیوه‌.

سەرجەم ڕۆژنامه‌کانی ئه‌و سه‌رده‌مه‌ له‌ شاری شیکاگۆ که‌مپینیکی به‌دناوکردن‌و مه‌حکومکردنی کریکارانیان به‌ڕێخستووه‌‌و کرێکارانیان به‌ “باندێکی ئاژاوه‌گێڕ، جه‌رده‌، دز، پیاوکوژ، شه‌ڕه‌نگێز، دڕنده‌ی به‌ خوێنتینوو، ترسنۆک، خوێڕی، جانه‌وه‌ر” وه‌سفکردووه‌. ئه‌م که‌مپینه‌ به‌ ڕادده‌یه‌ک توند‌و کاریگه‌ر بووه‌ که‌ ئیدوارد ئیڤیلینگ یه‌کێک له‌ زاواکانی کارل مارکس به‌ر له‌ ئیعدامکردنی ڕابه‌رانی کرێکاران ده‌ڵێت: “ئه‌گه‌ر ئه‌و کرێکارانه‌ سه‌ره‌نجام ئیعدامبکرێن ئه‌وه‌ ڕۆژنامه‌ی شیکاگۆ تریبیۆنه‌ که‌ ئه‌و کاره‌ ده‌کات.”

بەڵێ، چیرۆکی هه‌ڵهاتنی ڕۆژی یه‌کی ئایار به‌و جۆره‌ خوێناوی بووه‌. ئیتر ئه‌وه‌ مایه‌ی سه‌رسوڕمان نییه‌ که‌ ده‌وڵه‌ت، سه‌رمایه‌داران‌و میدیای ئه‌مریکا ده‌یانه‌وێت میژوی ڕاسته‌قینه‌ی یه‌کی ئایار بشارنه‌وه‌. ئه‌وان ده‌یانه‌وێت که‌ یادگاریه‌کان‌و بایه‌خ‌و جێگاوشوێنی یه‌کی ئایار له‌ زه‌ینی کرێکاراندا بسڕنه‌وه‌‌. ده‌وڵه‌تی ئه‌مریکا هه‌ر به‌م مه‌به‌سته‌ ڕۆژی یه‌کی ئایاری ناوناوه‌ “ڕۆژی یاسا” و رۆژێکی تری، که‌ یه‌که‌مین دووشه‌ممه‌ی مانگی سه‌پته‌مبه‌ره‌و هیچ بایه‌خ‌و مانایه‌کی مێژوویی نییه‌، کردووه‌ به‌ ڕۆژی کرێکار له‌ ئه‌مریکا.

به‌ڵام هاوچینه‌کانی کرێکارانی ئه‌مریکا نه‌یانهێشتووه‌ ئه‌م ڕۆژه‌‌و یادگارەکانی‌ له‌ نێو لاپه‌ڕه‌ زه‌رده‌کانی میژوی به‌ ده‌ستی سه‌رمایه‌داران نووسراو ون ببێت. ساڵی ١٨٨٩ له‌ یه‌که‌مین کۆبوونه‌وه‌ی ئه‌نته‌رناسیۆنالی دووه‌م (دووەم ڕێکخراوی جیهانی کرێکاران) که‌ له‌ پاریس به‌بۆنه‌ی سه‌دساڵه‌ی شۆڕشی فه‌ره‌نساوه به‌سترا، به‌ پیشنیاری رایمۆند لاڤیان، بۆنه‌ی ساڵیادی ناڕه‌زاییه‌کانی شیکاگۆوە، بانگه‌وازی خۆپیشاندانی سه‌رتاسه‌ری‌و جیهانی له‌ یه‌کی ئایاری ساڵی ١٨٩٠دا کرد. خۆپیشاندانەکان‌ به‌ ڕادده‌یه‌ک سه‌رکه‌وتوو بوون که‌ ساڵی دواتر واتە ١٨٩١ یه‌کی ئایار به‌ ڕه‌سمی له‌ لایه‌ن کۆنگره‌ی دووه‌می ئه‌نته‌رناسیۆنالی دووەم‌ وه‌ک چالاکیه‌کی ساڵانه‌ ناسرا.

ساڵی ١٩٠٤ کۆنفرانسی ئه‌نته‌رناسیۆنالی دووەم له‌ ئه‌مستردام بانگه‌وازی هه‌موو پارته‌ سۆشیال-دیموکراته‌کان‌و یه‌کیتیه‌ کرێکاریه‌کانی هه‌موو وڵاته‌کان بۆ خۆپیشاندانی چالاک‌ له‌ ڕۆژی یه‌کی ئایاردا، له‌ پێناوی به‌ یاسایی کردنی ڕۆژکاری هه‌شت سه‌عاته‌‌، بۆ خواسته‌ چینایه‌تیه‌کانی پرۆلیتاریا‌و له‌ پیناوی ئاشتی جیهانی کرد. به‌و پێیه‌ که‌ باشترین شێوازی خۆپیشاندان مانگرتنه‌ کۆنگره‌ ئه‌وه‌ی کرد به‌ ئه‌رکی هه‌موو ڕێکخراوه‌ پرۆلیتاریه‌کانی هه‌موو ووڵاته‌کان که‌ له‌ ڕۆژی یه‌کی ئایاردا کار ڕابگرن، له‌ هه‌ر جێگایه‌ک ئه‌م کاره‌، به‌ بێ مه‌ترسی گیانیی بۆ کرێکاران، کارێکی شیاوە.

ڕاستیه‌که‌ی ڕاگرتنی کار بۆ کۆیله‌کانی سه‌رمایه‌ زۆر جار پڕ مه‌ترسی بووه‌‌. ئایار به‌ نێو زۆر ڕووداوی خویناویدا میژوویه‌کی سووری بۆ کرێکاران‌و تاریکی بۆ سه‌رمایه‌داری‌و چینی بۆرژوا تۆمارکردووه‌. رۆژی یه‌کی ئایاری ساڵی ١٨٩١ له‌ ئه‌وروپا هاوکات له‌گه‌ڵ ئه‌وه‌‌ی ڕۆژی جه‌ژن‌ و هاتنه‌ مه‌یدانی سه‌رتاسه‌ری چینی کرێکار بووه، به‌ڵام‌ ڕۆژیکی خوێناویش بووه‌. له‌ ئیتالیا‌و فه‌رنسا‌و هه‌نگاریا پۆلیس هێرشی کردوه‌ته‌ سه‌ر کریکاران‌و له‌ رۆما کرێکارێک‌، له‌ پاریس  سێ کرێکار، له‌ ناوچه‌ی فراونیر حەوت کرێکاری کانه‌کانی خه‌ڵوز‌و کوژراون‌و له‌ هه‌نگاریا ده‌رگیری‌و شه‌ڕی ڕۆژی یه‌کی ئایار چه‌ند ڕۆژ‌و هه‌فته‌ی خایاندووه‌‌و کیشاویه‌ته‌ ڕاگه‌یاندنی حکومەتی باری نائاسایی (ئه‌حکامی عورفی)‌و سه‌ره‌نجام به‌ سه‌رکوتی پۆلیسی خۆپیشاندانه‌کان کۆتاییان پێ هینراوه‌.

له‌ په‌لاماری پۆلیس بۆ سه‌ر کرێکاران له‌ یه‌کی ئایاری ١٩١٩ له‌ کلیڤلاند له‌ ویلایه‌تی ئۆهایۆ له‌ ئه‌مریکا که‌ تیایدا ٤٢ کەس له‌ کرێکاران کوژراون‌و بریندار بوون‌ ته‌نها له‌به‌رئه‌وه‌ی ئاماده‌ نه‌بوون ئاڵا سوره‌کانی ده‌ستیان داگرن‌ (شایانی باسه‌ پاش ئه‌و ڕووداوه‌ ئاڵای سور له‌ ئۆهایۆ به‌ یاسا قه‌ده‌غه‌ کراوه‌)، تاکو هێرشی پۆلیس بۆ سه‌ر خۆپیشانده‌ران له‌ ئه‌لمانیا له‌ یه‌کی ئایاری ١٩٢٩ که‌ تیایدا له‌ لایه‌ن پۆلیسه‌وه ٣٢ کرێکار کوژراون‌‌و زیاتر له ١١ هه‌زار فیشه‌ک به‌ ڕووی کرێکاراندا ته‌قێنراوه‌‌، تاکو په‌لاماری فاشسته‌کانی تورکیا به‌ یارمه‌تی پۆلیس بۆ سه‌ر خۆپیشاندانی یه‌کی ئایار له‌ مه‌یدانی ته‌قسیمی ئه‌سته‌مبوڵ له ١٩٧٧ که ٤٢ کوژراو و ٢٢٠ برینداری لێ که‌وته‌وه‌، ئایار به‌ نێو زنجیره‌یه‌ک قوربانیدان‌و خه‌باتی دلێرانه‌ی کرێکاراندا بووه‌ته‌ ڕۆژێکی میژوویی بۆ به‌رپه‌رچدانه‌وه‌ی چه‌وساندنه‌وه‌‌و سته‌می سه‌رمایه‌داری.

 ئایا بانگه‌شه‌کاران بۆ دیموکراسی بۆرژوایی‌و ئه‌وانه‌ی ئیدیعا ده‌که‌ن که‌ سه‌رمایه‌داری چوارچێوه‌یه‌کی بۆ مافه‌کانی کریکاران داناوه‌ ده‌‌توانن حاشا له‌و ڕاستیه‌ بکه‌ن که‌ هه‌ر ده‌ستکه‌وت‌و پێشکه‌وتنێک که‌ کرێکاران به‌ده‌ستیان هێناوه‌ به‌رهه‌می خه‌باتی یه‌کگرتوو‌ و ڕێکخراوی خۆیان ‌و قوربانی گه‌وره‌ بووه ‌و میژووی مافه‌ سه‌ندراوه‌کانی کریکاران له‌ سایه‌ی سه‌رمایه‌داریدا به‌ خوێنی خۆیان نووسراوه‌؟ ڕاستیه‌کی حاشاهه‌ڵنه‌گر ئه‌وه‌یه‌ که‌ هیچ کات سه‌رمایه‌داران ‌و ده‌وڵه‌ته‌کانیان به‌ خوایشتی خۆیان ساده‌ترین ماف‌و ئازادییان بۆ کرێکاران به‌ ڕه‌سمی نه‌ناسیوه‌‌ و هه‌رچی به‌ ده‌ستهاتووه‌ به‌رهه‌می خه‌باتی یه‌کگرتوو ‌و ڕیکخراوی کرێکارانه‌. خه‌باتێک که‌ نه‌ک ته‌نها چینی کرێکار له‌ به‌رهه‌مه‌کانی به‌هره‌مه‌ند بووه‌، به‌ڵکو ئازادی‌و یه‌کسانی‌و خۆشگوزه‌رانی زیاتری بۆ جه‌ماوه‌ر ‌و هه‌موو کۆمه‌ڵگا لێ که‌وتۆته‌وه‌. ئه‌مه‌ ده‌رسێکی مێژویی گرنگی یه‌کی ئایاره‌.

بەڕێزە یادی گیانبه‌ختکردووانی جووڵانه‌وه‌ی کرێکاری

پیرۆز بێت یه‌کی ئایار!