ئیتر چەك دادەنێم

بەدڵی شكاو
دەڕۆمەوە ماڵەكەی خۆم
دڵێك شكاوتر لە دۆڕانی جەنگ
تاریك تر لە نهێنیەكانی ڕادەست !

دەڕۆمەوە …
وەك بێكەسترین مرۆڤی دنیا
وەك تفەنگێكی ساردوسڕ
لە شەڕێكی دەستەویەخەدا
گوللەیەكی گڕ نەدابێت
بەدڵی شكاو
دەڕۆمەوە ماڵەكەی خۆم !

ئەوە ئێمەین گەلۆ ، ئەوە ئێمە
مێژوو بەخەڵووز دەنووسینەوە نەك بە تیشك
هەمیشە لە دووڕیانی مان و نەماندا وێڵ
لە ئێستادا ون و لە ئاییندەشدا سەراب
هەمیشە دەستێكمان لە مەرگی خۆماندایەو
دەستەكەی تریشمان بە سینگەوە بۆ كڕنووش !

دەڕۆمەوە ….
بە جەستەیەكی لەت و پەرتەوە
دەڕۆمەوە ماڵەكەی خۆم
ئیتر بۆ هەمیشە دەڕوانمە خۆرئاوابوون
تاریكی دەپۆشم
دەزانم جارێكی تر
تیشكێ لەدەرگاكەم نادات
هەتاو ڕووناكاتەوە حەوشەكەم
باخچەكەشم
وەك شكۆی نیشتیمان وشك دەبێ
وەك شكۆی سەنگەر هەڵدەپروكێ
ماڵەكەم دەبێتە پرسەخانە
پرسەی نیشتیمانێك …
خۆمان لە كوشتنیدا قارەمانین قارەمان !!