هاوڕێ مام خدر:دەبێ ساڵی نوێ بکەینە ساڵی ئاشتی و خۆشگوزەرانی

هاوڕێ مام خدر سکرتێری گشتی بزووتنەوەی دیموکراتی گەلی کوردستان بەبۆنەی ساڵی نوێی زاینی پەیامێکی پیرۆزبایی ئاراستەی خەڵکی کوردستان و عێراق و کرێکاران و زەحمەتکێشان و چین و توێژە جیاوازەکان دەکا و  راشیدەگەیەنیت دەبێ هەموومان هەوڵەکانمان چڕ بکەینەوە بۆ ئاشتەوایی گشتی و تێپەڕاندنی قەیرانەکان ، ئەمەی خوارەوە دەقی پەیامەکەیە :

بەبۆنەی هاتنی ساڵی نوێی ( ٢٠١٨ زایینی )گەرمترین و جوانترین پیرۆزبایی ئاراستەی سەرجەم خەڵکی کوردستان و عێراق دەکەم ،کرێکاران و جوتیاران و خەڵکی زەحمەتکێشی وڵاتەکەمان لەچوار ساڵی رابردو بەهۆی ئەو بارودۆخە نەخوازراوەی بەسەر میلەتەکەماندا هات بە کردەوە سەلماندیان کۆڵەکەی بەرەوپێشچون و خۆراگری و دڵسۆزین و جێگای ئومێد و دوارۆژی میلەتەکەمانن بۆ بنیاتنانی کۆمەڵگایەکی بێ چین و چەوسانەوە و یەکسان . بەهیواین ساڵی نوێ ساڵی کۆتایهاتنی ناخۆشیەکان بێت..

لەگەڵ ئەوەی خەڵکی کوردستان بەگشتی زۆر لە ناخۆشیان چەشت ،بەڵام بە وورەیەکی پۆڵاینەوە رووبەرووی هەموو قەیران و پلانی دوژمنان بونەوە ، بەڵام لە ساڵی نوێدا کە رێکخراوی تیرۆرشتی داعش گۆڕی گووم کرد و نرخی نەوت بەرز بۆتەوە ، قەیرانی سەختی دارایی کەمەری کۆمەڵگای شکاندووە ئیتر دەبێت جاوێک بە بژێوی ژیانی خەڵک و فەرمانبەران بخشێندریتەوە و بەرژەوەندی تەسکی حزبی وەلا بنریت و ئاشتەوایی گشتی هەموو هێز و لایەنە سیاسیەکان ڕابگەیەندرێت .
لەساڵی رابردوو دوژمنانی کورد و کوردستان هێرشی هەمەلایەنە و دڕندەیان بۆسەر ماف و ئازادییەکانی خەڵکی کوردستان دەست پێکرد،زنجیرە پەلاماردانەکانی تیرۆرستانی دەوڵەتی ئیسلامی لە دڕندەترینیان بوو، کە دەیانەوێت کۆمەڵگا بۆ چەندین دەیە بگەڕێنەوە دواوە و چاویان بە ئازادی و مەدەنیەت و خۆشگوزەرانی خەڵک هەڵنایەت ،بەڵام خەڵکی کوردستان بەگشتی و هێزی پێشمەرگە گیان فیدایانە بەرەنگاریان بونەوە وەڵامی ددان شکێنیان دانەوە کە ئیتر خەڵکی کوردستان ناگەڕێتەوە دواوە و بەڵکو بە کەمتر لە ئازادی و مەدەنیەت و ئارامی و خۆشگوزارانی رازی نابێت،بەهیواین ساڵی نوێ ساڵی کۆتایهێنانی تیرۆر و دەستڕاگەیشتنی خەڵکی کوردستان بێت بەهەمو حەز و هیوا و خۆزگەکانیان .
ئێمە لە بزووتنەوەی دیموکراتی گەلی کوردستان،هەمو هەوڵێکی خۆمان خستۆتە گەڕ بۆئەوەی بیری توندڕەویی و تایەفەگەری لە کۆمەڵگا بنەبڕ بکەین و هەمو تاکێک لەسەر بیری ئازادیخوازی و پێشکەوتووخوازی و مەدەنیەت پەروەردە بکەین تاکو هەموان بەیەکسانی لە کۆمەڵگا بەختەوەر بن .
باشترکردنی ژیانی کرێکاران و جوتیاران و خەڵکی بەشمەینەتی کوردستان و هێنانە کایەی چەسپاندنی یاسا و عەدالەتی کۆمەڵایەتی، وەک بۆ هەمیشە بەرنامە ئێمە بوە و لە ساڵی نوێش جەسورانەتر کاری بۆ دەکەین، دووبارە ساڵی نوێتان پیرۆز بێت .

مام خدر
سکرتێری گشتی بزووتنەوەی دیموکراتی گەلی کوردستان
٣٠-١٢-٢٠١٧