پەنابەرانی کورد لە نامەیەکدا سەرۆک وەزیرانی بەریتانیا بە بەرپرسیار دەزانن
پەنابەرانی کورد، سەرۆک وەزیرانی بەریتانیا بە بەرپرسیار دەزانن لە گیانلەدەستدانی گەنجیکی کورد و لە نامەیەکیشدا رایدەگەیەنن، کەسوکارمان لەگەڵ داعش شەر دەکات بۆ ئەوەی خەڵکی ئەوروپا ئاسایشی هەبێت و ئێمەش دەمانەوێ بە ئارامی بژین.
پەنابەرانی کەمپی دونکیرک دەستەیەکی نوێنەرایەتیان پێکهیناوە و نامەیەکیان بۆ دەیڤید کامیرۆن، سەرۆک وەزیرانی بریتانیا، نووسیوە و داوایانلێکردوە کە سەردانی کەمپەکەیان بکات و بەچاوی خۆی بارودۆخی خراپی ئەو پەنابەرانە ببینێت.
کەمپی دونکیرک لە فەرەنسا و لە باکووری شاری دونکیرک هەڵکەوتووە، 1300 پەنابەر لەو کەمپەدا دەژین کە کورد، ئێرانی، سوری و کوەیتی پێکهاتوون. 
لە نامەکەی ئەو پەنابەرانەدا (کە وێنەیەکی لە لایەن رێکخراوی هاوکاری پەنابەران Help Refugees دراوەتە خەندان) و ئاڕاستەی دەیڤید کامیرۆن کراوە، هاتووە، ” کەمتەرخەمی ئێوە دەرهەق بە بارودۆخی ئێمە گیانلەدەستدانی کورێکی 18 ساڵە بەناوی محەممەد-ی لێکەوتەوە کە دەیویست ژیانێکی باشتر بۆ خۆی دابین بکات و بروات بۆ لای ئەندامانی بنەماڵەکەی لە بەریتانیا”.
هەینی ڕابردوو ، محەمەد حوسێن-ی تهمهن 18 ساڵ کە خەڵکی شاری سلێمانی بوو لە رووداوێکی هاتووچۆدا لە بریتانیا گیانیلەدەستدا.
بە پێی پێگەی گاردیان، محەممەد شەش مانگ لە کەمپی دونکیرک بووە و ئەو شەوە ویستوویەتی سەردانی ئەندامانی بنەماڵەکەی بکات کە لە بەریتانیا دەژین، بەڵام کەوتە ژێر ئۆتۆمبێلێکی بارهەڵگر و بەو هۆیەوە گیانیلەدەستدا.
ئەو پەنابەرانە لە نامەکەیاندا ئاماژە بەوە دەکەن کە حکومەتی فەرەنسا ئەوانی ناچارکردوە لە بارودۆخێکی زۆر خراپدا ژیان بەسەرببەن و تەنیا هەڵوێستی دەیڤید کامیرۆنیش ئەوە بووە کە بودجەی زیاتر بۆ کۆنترۆڵی توندتری سنوورەکانی نێوان فەرەنسا و بەریتانیا تەرخان بکات کە ئەو سیاسەت وێنە و ناوبانگی بریتانیا لە جیهان خراپ دەکات.
پێشتریش مادی هاریس، لە دەزگای خێرخوازی بەریتانیا رایگهیاندبووه، “محەممەد دەیویست ژیانێکی باشتر دابین بکات و لەو پێناوەدا گیانی لەدەستدا و حکومەتی ئێمە لە بەرامبەر گیان لەدەستدانی بەرپرسیارە”.
هەروەها جۆرج گابریل لە رێکخراوی ناحکوومی هاووڵاتیانی بریتانیا (Citizens UK)، مردنی محەممەد بە ئاماژەیەک دەزانێت بەو مەترسییەی چاوەروانی سەدان منداڵی پەناخواز دەکات کە لە کەمپەکانی دونکیرک و گالاس دەژین. گابریتی باسیلەوەشکردبوو، کە حکومەتی بەریتانیا پێویستە شەرم بکات لەوەی کاری زیاتر بۆ وەرگیران و پاراستنی ئەو منداڵە پەناخوزانە ناکات.
لە بەشێکی دیکەی نامەکەی پەنابەراندا هاتووە کە زۆرێک لەو کەسانەی لە کەمپی دونکیرک دەژین، ئەندامانی بنەماڵەیان لە بەریتانیا هەیە و بەو پێی یاساکانی بەریتانیا دەتوانن داوای مافی پەنابەرێتی لەو وڵاتە بکەن و حکومەتی بەریتانیا بەرپرسیارە لەوەی هاوکاری ئەو پەنابەرانە بکات کە لە ئاسایش و ئازادیدا لە بەریتانیا بژین.
لە کۆتایی نامەکەشدا هاتووە کە “ئێمە تیرۆریست نین. ئێمە داعش نین بەڵکوو لەدەست داعش ڕامانکردووە. خەڵکەکەمان لەگەڵ داعش شەر دەکات بۆ ئەوەی خەڵکی ئەوروپاش ئاسایشی هەبێت و ئێمەش دەمانەوێ لەگەڵ بنەماڵە و هاورێکانمان لە بەریتانیا لە ئاسایشدا بژین.”