عوسمان زیندانی :
لەبەر بەیانی مێژووی نادیارەوە ، دوو چەمکی گرنگ وپڕ بەها، کە هەڵگری خواست و ئارەزووی ملیارەها مرۆڤە ، وە لەپێناویدا ملیۆنەها ئادەمیزاد بوون بە قوربانی و سەدان هەزار هاوڕێی تێکۆشەر وئینسانی ڕۆشنبیڕ و ئازادیخواز تووشی بێ مافی و ئازار و ناڕەحەتی و چەرمەسەری و گرتن وکوشتن بوونەتەوە.
لەکاتی جەنگ ، لەپێشەوەی سەنگەری بەرگری ، لەناو زینداندا ، لەکاتی فشاری سیاسی و ئاوارەیی لە نەبونی
و هەژاری و قەیرانەکاندا ، لەچرکە ساتەکانی دەربڕینی هەڵوێستی سەربەخۆی ئینسانی و بیروڕای ئازادانەیاندا.
بەڵام بێ هیچ فێڵ و ترس و دوو ڕووی و مەرامێکی تایبەتی ،ملیۆنان کەس قوربانیاندا لەکاتی داگیرکاری
و بەرگری لەپاراستنی نیشتماندا .
هەزاران کرێکار بۆ مافی ڕەوایی خۆیان بێماف و بێکار
و لەزیندان نران لە سەروەختی ڕاپەڕین وخۆپیشاندان
و مانگرتندا .
سەدان ڕۆژنامەنووس و چالاکوان ڕووبەڕووی زیندان
و توندوتیژی وتیرۆر بونەوە لەچرکەساتی دەرخستنی ڕاستیەکاندا .
هەزاران ئەندامی تێکۆشەرو خۆنەوویستی حزبەکان لەم سەری ڕاست بۆ ئەو سەری چەپ وەلانران لە کاتی کۆنفراس و گۆنگرە و دیدار و کۆبونەوە دواکەوتو و بەسەرچووەکاندا ،خصوصەن لەکاتی دەربڕینی بیروڕای ئازاد و جیاوازدا .
بەڵام ئیرادەی بەرز و ئازادانەی مرۆڤی سەربەست و خاوەن ئیرادە ، بە بوێری و جەسوارنە وەکو ڕوویی سووری ڕۆژی دەم کەل لە بەرەنگاریەکی بەردەوامی
(دنیایی کۆیلایەتی و نادادیدایە ) .
ئەگەر خۆمان گێل نەکەین ، هەمووان باش دەزانین فەزای ( ئازادی و یەکسانی × کۆیلایەتی و نادادی )
واتای چیە و چ جیهانێکی لەیەک جیاواز و دژ بەیەکن،
چ مەرگەسات و ماڵوێرانی بەدوای خۆیدا هێناوە ئەگەر دووەمیان سەرکەوتوو بووبێت ، لە هەمان کاتدا چ پێشڤەچوون و خۆشبەختی و داهێنانی دروستکردوە ئەگەر یەکەمیان بووبێتە بەشێک لە ژیانی ناوخۆیی و دەرەکی دنیایی ڕامیاری ناو حزب و کۆمەڵگە و دەوڵەت.
ئەزموونی زۆر و جۆراو جۆر هەیە لەناوقوڵایی دنیایی سیاسی ئێستا و ململانێی مێژووی مرۆڤایەتیدا کە
بەشێکی بە سەرکەوتن کۆتایی هاتوە ، بەشێکی تری بووتە قوربانی ، بەشێکی هێشتا لەناو ژانی لەدایک بوونێکی نوێدایە و بەردەوامە لە کێشمەکێش و بێنەو بەردەی پرسیارە قورسەکە ئایە کام ئاراستە ڕاستە ؟
و کام بۆچوون هەڵەیە ؟
و کام بەرنامە لەبەرژەوەندی گشتی کۆمەڵگەدایە ؟
و کامەیان لەدژی خواست و پێداویستیەمرۆیەکاندایە؟ بەتایبەتی مافی چینی کرێکار و خەڵکی زەحمەتکێش .
جا زەحمەتکێشانی بیروبازوو ئەوانەی لە ژێر هەژمونی دەوڵەتدان یان کۆمەڵ یان حزبدان .
لەوەتەی مرۆڤ هەیە لەو ساتەوەی مێژووی نوسراو
و نەنووسراو هەیە بەڕوونی دیارە بۆچی (هەمە دیکتاتۆرەکان) ئازادی بەرامبەر و دەوروبەر پێشێل دەکەن
و دژایەتی دەکەن ؟
بۆچی فرسەتی یەکسان و گونجاو ناڕەخسێن بۆ کارو چالاکی سیاسی و کۆمەڵایەتی و حزبی ودەوڵەتداری بۆ هەموو تاکەکانی ناو ڕێکخراوی مەدەنی و فەرمانبەرانی دەوڵەت و تێکۆشەرانی ناو حزب و ئەندامانی کۆمەڵ ؟
بەرژەوەندیە چینایەتیە جیاواز ودژ بەیەکەکان هەوێنی دروست بوونی ناکۆکی و یەکتر قبوڵ نەکردن و ملشکاندن
و کوشتو بڕی ناو دنیای ڕامیاری هەموو نەخشە ئاڵۆز و خوێناویەکانە .
ئەی دەسەڵاتدار و دەستڕۆشتووی ناو بازنەی ململانێی ( دەوڵەت وکۆمەڵگە و حزب ) ئاخر ئەگەر خاوەن بەرژەوەندی نیت و ناتەوێ وویستی خۆت فەرز بکەیت بۆ( گوێ ناگری) و (ئازادی ) فەراهەم ناکەی ؟
ئەگەر دەزانن مافەکان حەقیقەتی هەیە بۆچی ئیرادە ناکەی بۆ گۆڕانگاری و چاکسازی بۆ بەرجەستە کردنی جیهانی ( یەکسانی)
ئاخر ئەگەر بەرژوەندی (چینایەتی و قازانج پەرستی) نەبێت بۆچی خاوەنکار مافی کرێکار نادات ؟
ئەگەر (دواکەوتووی) نەبێت بۆچی خێزان مافی مناڵان پێشێل دەکەن ؟
ئەگەر( ملهوڕی سیاسی ) نەبێت بۆچی سەرکردەی حزبەکان تامردن واز لە سکرتێری ناهێنن؟
ئەگەر( دیکتاتۆریەت ) نەبێ بۆچی خۆپیشاندان لە شەقام و بیروڕای ئازاد لە ژیانی حزبایەتیدا سەرکووت دەکرێ ؟
دیارە ململانێی ناو قوڵایەکانی مێژووی مرۆڤایەتی گەواهیدەری ئەوەیە دیکتاتۆریەت لەپێناو پاراستنی بەرژەوەندی چینی دەستڕۆشتوو بۆرژوادایە .
ئێ خۆ تیۆرە زیندوەکانی مارکسیزم و دنیای پیشکەوتوخوازی ڕێی نیشانداووین کە دیاردەکانی ( دواکەوتووی و گوێ نەگرتن و ملهوڕی سیاسی و دیکتاتۆریەت و بەرژەوەندی چینایەتی و قازانج پەرستی )
سیفەت وخەسڵەتی ناو دنیاو ئەخلاقیاتی سیستەمی سەرمایەداری و نیزامی چینایەتیە ، کە پایەکانی لەسەر ئەم دیاردانە بونیات ناوە .
بۆیە ئەرکێکی شیوعیانە و شۆڕشگێڕانەیە ک لە هەموو سات و زەمانێکدا لەهەموو شوێن و مەکانێکدا لەهەموو ڕووداو ئاڵوگۆرێکدا لە هەموو تەنگەژەو قەیرانێکدا . مرۆڤ سەربەست و ئازاد و خاوەن ئیرادە و جەسوور بێت لەسەر ماف و ئازادیەکان و یەکسانی ئینسانەکان ، ئەمەسیفەتی ڕاستەقینە وخەسڵەتی مرۆڤی کۆمۆنیستە .
