بەداخەوە جارێکیتر دەستی رەشی تیرۆرستان گەیشتە خەڵکی سڤیلی شاری کەرکوک و لە شەوی ٣٠لەسەر ٣١ی ئایاری ٢٠١٩ چەند تەقینەوەیەك لە چەند گەڕەکێکی شاری کەرکوك روویانداو بەهۆیەوە ژمارەیەك خەڵکی مەدەنی بوونە قوربانی و چەند کەسیش برینداربوون.
ئێمە لە بزووتنەوەی دیموکراتی گەلی کوردستان ،وێڕایی سەرکۆنەکردنی ئەو تاوانە تیرۆریستیە بەرامبەر بە خەڵکی مەدەنی و بێدیفاعی کەرکوك، پرسەی خۆی ئاراستەی کەسوکاری قوربانیەکان دەکەین و ئومێدی چاكبونەوە بۆ بریندارەکان دەخوازیت.
بەداخەوە شاری کەرکوک وەکو شارێکی فرە پێکهاتەی مەزهەبی و دینی و نەتەوەیی و ناوچەیەکی دەوڵەمەند بە نەوت و سامانی سروشتی بۆتە چەقی ململانیی نێوان لایەنە سیاسیەکان و بەهەموو لایەکیشەوە لەهەوڵدابوونە دەست بەسەر ئیدارە و سامانەکەی بگرن،لەم سۆنگەیەشەوە هەمیشە قوربانی گەورەی لێکەوتۆتەوە و خەڵکەکەی بۆتە قوربانی ، ئێمە لێرەدا جارێکیتر داوا لەهێز و لایەنە سیاسیەکان دەکەین بەرژەوەندی تەسکی حزبی بەلاوە بنێن،ئەوە تەنها یەکگرتووی و یەکهەڵوێستیە دەستی تیرۆرستان کورت دەکاتەوە لەسەر گیان و ژیانی خەڵک .
نەفرەت لە تیرۆر و تیرۆرستان
ناوەندی کەرکوکی
بزووتنەوەی دیموکراتی گەلی کوردستان
٣١\٥\٢٠١٩