لەیادی شەش ساڵەی تیرۆركردنی رۆژنامەنووس (سەردەشت عوسمان) رۆژی پێنج شەممە ڕێکەوتی ٥\٥\ ٢٠١٦رێكخراوی زار بۆ بەرگری لەئازادییەكان گردبوونەوەیەكی لەشوێنی رفاندنی ناوبراو رێكخست و داوا دەكەن چاكسازیەكانی بارزانی لەكەیسی سەردەشت عوسمان دەست پێبكات.
لەیاداشتێكدا خانەوادەی سەردەشت عوسمان رایانگەیاند، بەداخەوە شەش ساڵە رۆژنامەنووسان و چاڵاكان و یاساناسان بەدەنگی بەرز داوا دەكەن، كەیسی سەردەشت عوسمان دەستی بەدەستی پێنەكرێت و لێكۆڵینەوەی بێ لایەنانەی لەچوارچێوەی دادگای سەربەخۆ بۆ ئەنجام بدرێ و بكوژانی سەردەشت راپێچی دادگا بكرێن، كەچی دوای شەش ساڵ هیچ وەڵامێك بۆ داواكاریەكان نەبووە.
ئەوەش هاتووە :ئەگەر مەبەستی دەسەڵات لەبیربردنی ئەو كەیسە بێت لەبیری خەڵك و رۆژنامەنووسان و چاڵاكان بەدڵنیاییەوە پێچەوانەكەی راستە و ساڵ بەساڵ لەپێداگیری و داواكاریەكانمان گەرمتر دەبین، هەوڵی زۆریش درا سەردەشت وەك رۆژنامەنووس نەناسرێت و دایببڕن لەم چینە و هەوڵدرا بخرێتە چوارچێوەیەكی كێشەی خێزانی، بەڵام بەپاڵپشتی و دەنگە ئازادیخوازەكان بەردەوام دەبین لەزیندوو راگرتن و بەكرانەوەو هێشتنەوەی ئەم كەیسە.
لەكۆتایشدا داوا دەكەن، چاكسازییەكانی بارزانی كە ئێستا باسی لێوەدەكرێ و دەیانەوێت بۆ مێژوو هەموو تاكێكی كورد بەچاكسازی راستەقینەی بزانن با كەیسی سەردەشت عوسمان ببێتە بنەمای چاكسازی و دورخستنەوەی دەستی حزب لەدادگا و یاساكان هەرچی زوە لەرێگەی لیژنەیەكی سەربەخۆ بەدواداچون بكەن بۆ كەیسی تیرۆركردنی سەردەست عوسمان، لەبەر ئەوەی بەرپرسیارەتی سەرەكیان دەكەوێتە ئەستۆ و وەڵامی داخوازیەكان و چاوەڕوانی خەڵك بدەنەوە.
لای خۆشیەوە لەلێدوانێكی رۆژنامەوانیدا دایكی سەردەشت عوسمان رایگەییاند، تەنها داواكاری ئەو تۆڵەی خوێنی كوڕەكەیەتی.
هاوكات باوكی سەردەشت عوسمان رایگەیاند، بڕوای بەم دەسەڵاتە نەماوە كە هیچ كارێك بكات.
