لێدوانێك له بزووتنه‌وه‌ی دیموكراتی گه‌لی كوردستان ..
له به‌رامبه‌ر هێرشه ئاسمانیه‌كانی ده‌وڵه‌تی توركیا بۆ سه‌ر خاكی هه‌رێمی كوردستان و شه‌هید بوونی چه‌ندین هاوڵاتی به ناوی بزووتنه‌وه‌ی دیموكراتی گه‌لی كوردستان سه‌ركۆنه‌ی هێرشه‌كان ده‌كه‌ین و پێمان وایه كه ده‌بێت هه‌رچی زووتره ئه‌م هێرشانه بوه‌ستێندرێن له پێناو رێگه‌گرتن له زیاتری شه‌هید بوونی هاوڵاتیانی هه‌رێمی كوردستان به تایبه‌تی دوا هێرشی ده‌وڵه‌تی توركیا بۆ سه‌ر گوندی ( زارگه‌لی ) كه بووه هۆی شه‌هید بوونی چه‌ندین هاوڵاتی سیڤیل . زار گه‌لی لانكه‌ی خه‌بات و تێكۆشانی پێشمه‌رگه‌له شۆرشه‌كانی كوردستان قوربانی زۆری داوه ، وێرای سه‌ره‌خۆشیمان بۆ بنه‌ماڵه‌ی شه‌هیده‌كان هیوای چاكبوونه‌وه‌ی خێرا بۆ برینداره‌كان ده‌خوازین و له هه‌مان كاتدا پێمان وایه تاكه چاره‌سه‌ری كێشه‌كان ته‌نها ئاشتی و لێك تێگه‌یشتنه و هه‌ر گیز كێشه‌ی گه‌لێك له رێگه‌ی بۆمباباران كردن و شه‌ڕ و خوێن رشتن چاره‌سه‌ر نابێ ئه‌زموونی گه‌له‌كه‌مان له به‌شه‌كانی كوردستان راستی ئه‌م بۆچوونه ده‌سه‌لێمنێ . بۆیه داوا له حكومه‌تی توركیا ده‌كه‌ین هه‌رچی زووه بگه‌رێته‌وه سه‌ر مێزی گفتوگۆ و كۆتایی به پرۆسه سه‌ربازییه‌كان بهێنن .
بزووتنه‌وه‌ی دیموكراتی گه‌لی كوردستان
1|8|2015
