9
نووسینی: ڕۆزا حەمە ساڵح
مرۆڤ لەگەڵ لەدایکبوونیدا هەست بە ژیان دەکات، کاروانی گەشەکردنی هزر و جەستەی دەست پێدەکات و جوانی و ناشرینییەکانی ژیان دەبینێت. هیچ مرۆڤێک لە تەواوی تەمەنیدا بە ڕەهایی بەختەوەر نابێت، هیچ کاتێکیش خۆشبەختییەکانی بە پارە و سامانەوە گرێ نادرێت.
مرۆڤ لە قۆناغەکانی ژیانیدا بە خۆشی، ناخۆشی، ئازار و خەمدا تێدەپەڕێت و ڕووبەڕووی ترس، دڵەڕاوکێ و نەهامەتی دەبێتەوە. تەمەنەکانی ژیانی بە سروشتی خۆیان، وەک پڕۆسەیەک قۆناغ لە دوای قۆناغ دەبڕدرێن. لە هەندێک وێستگەدا ڕەنگە بە دۆخێکی لاوازی و بێتواناییدا تێپەڕێت و نەتوانێت زاڵ بێت بەسەر ئەندێشە و نیگەرانییەکانیدا، هەروەها ڕەنگە لە هەندێک قۆناغی دیکەشدا خۆشبەختی تەواوی ژیانی داگیر بکات. گرنگ ئەوەیە مرۆڤ لە کاتی ناخۆشی و کارەساتدا، هەمیشە بەدوای تروسکەی هیوا، ڕووناکی و هێزدا بگەڕێت. ئەو هێزەی کە دەتوانێت پشتی پێ ببەستێت و لە کاتی ئازارەکانیدا توانای بەرگری و خۆراگری پێ ببەخشێت، هێزی خێزانە.
خێزان تەنها کۆمەڵە کەسێک نین لەژێر یەک سەقفدا بژین، بەڵکو ئەو خێوەتگە هەمیشەیی و سەرەتا گرنگەیە کە سیمامان بۆ ماوەیەکی درێژ دەنەخشێنێت. ئەوێ یەکەمین فێرگەی مرۆڤە کە تێیدا پەروەردە دەبێت و لە ژیان تێدەگات. لە کاتی گەشەکردن و گەورەبوونیشدا، خێزان دەبێتە بناغەی یادەوەرییەکان و ئەرشیفی نێو مێشکمان پێکدەهێنێت.
خێزان تەنها سەرەتایەک نییە بۆ ناسینی ژیان، بەڵکو ئەو بەندەرە ئارامەیە کە کاتێک گەردەلوولەکانی ژیان و برینی یادەوەرییەکان ماندوومان دەکەن، هانای بۆ دەبەین. ئێمە هەرچەندە گەورە بین و دوور بکەوینەوە، هێشتا وەک دارێک واین کە هێزی لق و پۆپەکانمان لەو ڕەگانەوە وەردەگرین کە لەناو خێزانەکەماندا چێنراون؛ هەر ئەو ڕەگانەشە کە دەبنە پارێزەری ڕاستەقینەمان لە بەرامبەر هەر لادان و شکستێکی داهاتوودا.
لێرەوە تێدەگەین کە ژیان پڕۆسەیەکی بەردەوامی فێربوونە لە ڕابردوو بۆ بنیاتنانی داهاتوو. گەڕانەوە بۆ یادەوەری و بەهاکانی خێزان، پاشەکشە نییە، بەڵکو خۆپڕچەککردنە بەو ناسنامەیەی کە ڕێگەی ڕاستمان نیشان دەدات.
کۆتایی تەمەن و لوتکەی سەرکەوتنەکانمان هەرچییەک بن، شکۆی خێزان بە بەرزی و پیرۆزی دەمێنێتەوە. ئەوان تاکە پاڵپشتن کە بێمەرج بەشدارن لە خەم، ئازار و خۆشییەکانماندا. پاراستنی ئەم بەندەرە، پاراستنی ناسنامە و داهاتووی خۆمانە، بۆیە با هەمیشە لە ئامێزی خێزاندا هێزی بەردەوامبوون بدۆزینەوە و بەهاکانی بپارێزین.