ئەبو كاروان :
لەناوەندی سیاسی و میدیای كوردیدا، زۆرجار باسی حزبی گەورەو حزبی بچوك دەكرێ، ئامانج لەم پڕوپاگەندەیەش روونەو دەیانەوێ به كۆمەڵانی خەڵكی كوردستان بڵێن: بوونی هەندێ حزب و رێكخراو پێویست نیە، ئەمەش بەهەموو لێكدانەوەیەك دژی بنەماكانی ئازادی و دیموكراسی و فرەیی سیاسیە، هەروەك جێگای داخە ئەم جۆرە قسەو لێكدانەوەیە بەشێك لە ناوەندی رووناكبیران و نوسەران و خاوەنی هەڵگری بڕوانامە بەرزەكانیشی گرتوەتەوە.
دەمەوێ بە چیرۆكی راستەقینەی كادیرێكی حزبی شیوعی عێراق دەست پێبكەم، ئەویش “داود الزرعد” كەسایەتیەكی دیاری حەویجە بوو لەتەمەنی لاویدا پەیوەندی كردبووە ڕیزی حزبی شیوعیی عێراقی یەوە، ئەو لەگەڵ هاوڕێ “فەهد”ی دامەزرێنەری حزب زیندانی كرابوو، ئەم مرۆڤە تا بڵێی كەسێكی نیشتمان پەروەرو دڵسۆزو شیوعیەكی سەرسەخت بوو، لە هەموو قۆناغە جیاجیاكاندا رووبەڕووی دوژمنان و نەیارانی حزب و گەل دەبوەوە، ئەمنی حەویجەو كەركوك لە ئاست گەورەییدا كۆڵیاندا و نەیانتوانی تۆزقاڵێك لە ورەی كەم بكەنەوەو چۆكی پی دا بدەن ،هەر بۆیە پەنا بۆ ئەمنی عامە دەبەن تا لێكۆڵینەوەی لەگەڵدا بكەن و دوای ئەشكەنجەدان بەم شێوەیە لێكۆڵینەوەی لەگەڵدا دەكەن:
بەڕێوەبەر: ناووت چییە؟
داود: داود الزرعد
بەڕێوەبەر: لە نەتەوەی عەرەبیت و عەگاڵت لەسەرە؟
داود: بەڵێ
بەڕێوەبەر: لە نەتەوەی عەرەبیت و عەگاڵت لەسەرەو شیوعیت ئەی …………؟
داود: بەڵێ عەگاڵم لەسەرەو شیوعیم
بەڕێوەبەر: ئەی ……….. خەڵكی كوێیت؟
داود: خەڵكی حەویجەم
بەڕێوەبەر: ئەی ……….. لە نەتەوەی عەرەبیت و عەگاڵت لەسەرەو شیوعیت و خەڵكی حەویجەیت؟
داود: بەڵێ وایە
بەڕێوەبەر: ئەی ……….دڵنیام لە تایەفەی سونەیشی؟
داود: بەڵێ
بەڕێوەبەر: ئەی ………… لە نەتەوەی عەرەبیت و عەگاڵت لەسەرەوخەڵكی حەویجەیت و لە تایفەی سونەیت و شیوعیت؟ ئەفسەرەكان بیبەن بۆ لێكۆڵینەوەو ماوەیەكی تر بیهێننەوە بۆ ئەوەی دوا وتەی خۆی بڵێ.
دەیان پرسیاری لێ دەكەن و هەمووی پەیوەندی بە عەگاڵ و شیوعێتی و عەرەب بونییەوە هەبووە، جوێنەكانیش هەرهەمان “…….” بوو، لەپاش ئەشكەنجەدانی جۆراوجۆرو دوای چەند ڕۆژێك ئەفسەرەكان دەیگەڕێننەوە، دوای ئەشكەنجەدانێكی زۆرترو بەشێوازی جیاواز دەیبەنە بەردەم بەڕێوەبەری ئەمن، كەڕاستەوخۆ لێكۆڵینەوەی لەگەڵدا دەكات و لە پشت مێزەكەیەوە دانیشتوەو “داود”یش هەرنزیك میزەكە دادەنیشێ و ئەفسەر بە شەوق و زەوقەوە پێشوازی لێ دەكات و بڕوای وایە كۆتای پێهاتووە، هەربۆیە پرسیاری لێ دەكات و دەڵێت: دوا ووتەت چی یە ؟ ئەویش بە هێمنی عەگاڵەكە لەسەرخۆی دادەنێ و دەیخاتە سەرمێزی بەڕێوەبەرو پێی دەڵێت: سەیدی چەندین ڕۆژە لێكۆڵینەوەو ئەشكەنجەدانتان بەردەوامەو ئازارم دەدەن و كۆی پرسیارەكانتان لەسەر شیوعی بوون وعەگال وعەرەب بوونم بوو، لەبەرئەوە ئەو عەگاڵە بۆ ئێوەو شیوعێتی بۆ من؟
پرسی حزبی گەورەو حزبی بچوك، لەكوردستان و لەم ڕۆژانەدا جارێكی ترسەری هەڵدایەوەو ڕاگەیاندنەكان و بەشێك لە هەرزەكاری سیاسی و سیاسەتمەداران دەیخەنە ڕوو، تەنهاو تەنها ئەو بۆچونەیان لەسەركورسی پەرلەمانی و هەڵبژاردنەكان و بەدەستهێنانی دەنگەوە سەرچاوەی گرتوە، بێ ئەوەی واقیعی ئەمڕۆی كوردستان لەبەرچاوبگرن، دەسەڵات و پارەو پەیوەندی نێودەوڵەتی و هەرێمایەتی و مزگەوت و حوجرەكان.. هتد سەرچاوەی بیركردنەوەیان بێت . بۆ وڵام بەم بۆچوونە ناڕاست و ناوقیعی و ناشایستەیە بەرامبەر حزبی گەورەو حزبی بچوك، یان باسی مێژووی پڕشنگداری شیوعییەكان و خەباتی شارو زیندان و پێشمەرگایەتی و هەڵوێستی نیشتمانی و پێشمەرگایەتی و…. هتد ناكەم، بەڵكو ئاماژە بەچەند هەڵوێستێك دەدەم تەنها لەدوای ڕاپەرینی بەهاری ١٩٩١، كە پێم وایە بۆ ئەوەی بیەوێ تێبگات و خۆڵ نەكاتە چاوی خەڵكە وە بەسە.
یەكەم: ئەرێ دەزانن تەنها حزبی شیوعی بوو لە حزبەكانی بەرەی كوردستانی لە سەرەتای ڕاپەڕینی ١٩٩١وە گفتوگۆی رەد كردەوە لەگەڵ ڕژێمی بەعس و بێ متمانەیی خۆی پیشاندا لەبەرامبەر ئەم ڕژێمە كە ناكرێت لە دوای كیمیاباران و ئەنفالكردن و ڕووخاندنی دێهاتەكانی كوردستان لەلایەك و لەلایەكی ترەوەو هەڵوێستی هاوپەیمانەكان دژی ڕژێم و پشتگیری لەگەلی كوردستان، شاندی كوردستانی بچێتە بەغدا بەمەبەستی گفتوگۆكردن لەگەڵ ڕژێمی سەدام و دانیشتن لەگەڵ بەرپرسانی حزبی بەعس.
دووەم: ئەی ئەوە حزبی شیوعی نەبوو دژی ئاودیوكردنی كەرەستەكانی بیناسازی و بەتاڵانبردنی وەستایەوەو ئیدانەی ئەو جۆرە كارانەی دەكرد تا ئەو ڕادەیەیی نوێنەری حزب لە هەربازگەیەكدا بووایە رێگا بەو جۆرە كارانە نەدەدراو دژی دەوەستانەوە.
سێیەم: بەڕاست دەزانن هەردوای فەشەلی گفتوگۆ پێشمەرگەكانی حزبی شیوعی لەسەنگەری پێشەوەی بەرگریدا بوون و دەیان داستانیان تۆماركرد، لەگەڵ حزبەكانی تری بەرەی كوردستانیداو مێژوو لەلایەك و هاوڵاتیانی كوردستان شایەتحاڵی ئەوڕاستییەن، تا ئەو ئاستەی گەر شیوعییەكان لە قۆڵێكی بەرگریدا بوایەن هێندەی تر هاووڵاتیان دڵنیادەبوون لە سەرو ماڵیان.
چوارەم: كێ جاڕی فیدڕاڵیدا پێش حزبی شیوعی؟ دەتوانن بەڵگەنامەكان بخوێننەوە كە ئەم راستیە دەسەلمێنن؟
پێنجەم: ئەرێ بەڕاستیتانە هەڵبژاردنتان كردۆتە تەنها پێوەر بۆحزبی گەورەو حزبی بچوك؟ لە كاتێكدا یەكەمین هەڵبژاردنی پەرلەمان پڕبوو لە ساختەكاری و گزیكردن و بروسكەكانی سەرۆك و سەركردەكانی حزبەكان لە ئەرشیفدا ماون و پارێزراون، تا كارگەیشتە ئەوەی بڕیاربدرێت دوای شەش مانگی تر هەڵبژاردن بكەنەوەو كەچی نەكراو پێچەوانەكەی بەكاریان هێنا بۆ بەهێزكردنی پێگەی حزبی و سیاسی و دارایی و پەیوەندییەكانی خۆیان.
شەشەم: ئەرێ ئەوە حزبی شیوعی نەبوو دژی پێكهێنانی كابینەی یەكەم لەسەربنەمای پەنجا بە پەنجا وەستایەوە، روونیشی كردەوە كەئاڕاستەیەكی ترسناكەو هەرێم بەرەو كارەسات دەبات وچۆن دەبێت دابەشكردنی پلەو پۆست لەسەر بنەمای پەنجا بە پەنجا شۆڕبێتەوە تا دەگاتە كارگوزاریش.
حەوتەم: ئەی حزبی شیوعی نەبوو، دژی ئەوە وەستایەوە كەنابێت نۆبەرەی حكومەتی هەرێم و هێزی پێشمەرگە، شەڕی پەكەكە بكات لە بناری قەندیل وگارەوده یان شوینی تری كوردستان؟
هەشتەم: ئەرێ ئەوە حزبی شیوعی نەبوو دژی پێكهێنانی فەوج و لیوای تایبەتی هەردوو حزب وەستا، لە كاتێكدا وەزارەتی كاروباری پێشمەرگە هەیە؟ ئەی نەمان ووت پێكهێنانی ئەو هێزانەو شەڕی ڕاگەیاندنتان بەرەو شەڕی ناوخۆمان دەبات هەرواش بوو، گەورەترین زیانمان لە شەڕی ناوخۆی نێوان هەردوو حزبە باڵادەستەكە “یەكێتی و پارتی”دا كرد؟
نۆیەم: ئەی حزبی شیوعی نەبوو، كە شەڕدەستی پێكرد، دژی وەستاینەوەو بەپەلە داوای ڕاگرتنی شەڕمان كردو ئاگادارتانمان كردەوە كە ئەگەر بەردەوام بن، دەبێت بزانن بەعس و وڵاتانی دەوروبەر بەشداردەبن و زیانی گەورە بەرمیللەت و خۆتانیش دەكەوێت و لەهەرجارێك ئەوان بەشدارییان كردبێت، ئێمەش بە بەیاننامەو پەنابردن بۆ شەقام ئیدانەمان دەكردو رەدمان دەكردەوە. دەیەم: هەموو لایەك ئەو راستیەش دەزانن ئێمەبووین پەیوەندیمان لەگەڵ ووڵاتان رەدكردەوە بۆ سوودی بەرژەوەندی حزبی و ئەوانیش بە چەك و پارەو بەشداری لەشەڕ بۆ هاوكاری لایەنێك دژی ئەوی تر باوەشیان بۆ یەكتر دەكردەوەو هەموو جۆرە پەیوەندییەكتان هەبوو لە گەڵ وڵاتانی دراوسێ بەتایبەت “ئێران و توركیا”؟
یانزەهەم: ئەی ئێمە نەبووین، دژی گەندەڵی و بەهەدەردانی سامانی هەرێم و تەزكیەی حزبی و دامەزراندنی حزبی و مەحسوبییەت و مەنسوبییەت وەستاینەوەو بەهەموو خەڵكی كوردستانیشمان وت، ئەم جۆرە سیاسەتە وڵات بەرەو كاوڵكردن و داڕووخان دەبات.
دوانزەهەم: ئەی هەرئێمە نەبووین بەڕۆژانە هەڕەشەمان لێدەكرا لەهەولێرو سلێمانی، لەسەر خۆپیشاندان و داكۆكیكردن لە چین و توێژەكانی كۆمەڵ و ڕۆڵی ڕاگەیاندنەكانمان لە خستنە ڕووی راستییەكان و هەق بێژیدا.
سیانزەهەم: بەڕاست بیرتان چوەتەوە، ئێمە نەبووین دژی تیرۆركردنی تێكۆشەرەكانی دیموكرات و كۆمەڵەو شەڕی پەكەكە بووین لە هەموو ئاست و قۆناغەكانداو لە یەكەمەكان بووین شەرمەزاری ئەو جۆرە رەفتارو كردارانەمان دەكرد.
چواردەهەم: كام پڕۆژەو بڕیار هەبوە، لە زیانی خەڵك بووبێت و ئێمە لە دژی نەوەستابینەوە؟ كام لەشكركێشی توركیاو ئێران هەبوەو ئێمە لەدژی نەهاتبینە سەرشەقام؟ كام هەڵوێستی نا نیشتمانی و نانەتەوەیی بوەو ئێمە رەدمان نەكردبێتەوە؟ كام بڕیار هەبوە دژی بەرژەوەندی خەڵك بوەو ئێمە دژی نەوەستابینەوە؟ كام پەیوەندی زیانبەخش لە گەڵ دەرو دراوسێكانی هەرێم هەبوەو ئێمە مەترسییەكانمان بۆ خەڵك روون نەكردوەتەوە؟
ئەمانەو دەیان هەڵوێستی نیشتمانی و نەتەوەی ئێمە، ئەگەرسیاسەتی ئەوان وایكردبێت ئێمە حزبی بچوك بین و ئەوان حزبی گەورەبن، منیش هەروەك “داود الزرعد” ووتی عەگاڵ بۆ ئێوەو شیوعێتی بۆمن، دەڵێم” ئەگەر وایە، حزبی گەورە بە ساختەكاری هەڵبژاردن و قۆرخكاری و پەیوەندی ژێربەژێری دەوڵەتان و دوو ئیدارەیی و شەڕی ناوخۆ……تاد بۆ ئێوەو حزبی بچوكی پڕ لە هەڵوێست و مێژووی پڕشنگداری پاك بۆمن.
