دەڵێن دەوڵەمەندێکی شاری سلێمانی ویستویەتی پارچە زەویەک بدات بەمامۆستا قانعی شاعیر، مامۆستا قانیع سوپاسی کردوەو وتویەتی نامەوێ تا دەمرم چاوەخواری قسەی جەنابت بم، خەیامی بەرزە مرۆڤی دیرۆک لەوەڵامی قسەیەکی سەرداری ڕۆژدا زۆر توند وەڵامی داوەتەوە، بەجۆرێک سەرداری سەر کورسی بەموچەی شالیارێ ڕێزی لێناوە، دوای مردنی میریش خەیام کەویستویەتی پارەکە وەربگرێ خەزنەدار پێی وتوە ناتدەمێ ئەوەموچەی وەزیرێکە جا خەیام وەڵامی داوەتەوە پێنجسەت ساڵ جارێ خەیامێ دروست دەبێت، بەڵام دەکرێ هەموو ڕۆژێ چەند وەزیرێ دروست بن، جوامێری، بەڵێنداری و ڕاستگۆییە، ڕاستە ئەگەر مامی شێخ ڕەزای تاڵەبانی کیژی خۆی دابایە شێخ دەشیا مێژوو بەجۆرێکی دیکەی باسکردبا، ڕەنگە ئەو هەموو هەجوەی مامی و ڕەشەی ئامۆزایشیمان بۆ هەتا نەبینیبا، هەر نەدەنوسرا، ڕەنگە هیچیان ناجوامێری نەبن، هەردوکلا بڕو بیانوی خۆیان هەبێت، برادەر هەیە بەرپرسەکەی لەهیچەوەفڕێی داوەتە نێو باخێکی بەهەشتەوە، کەچی دواتر کەوتوەتە وێزەی و تانەو تەشەری لێداوە، هێشتا تا ئانیشکی لەهەنگوینەکەدابوە، نەک نەیوتوە تاڵە، گوتویەتی ئەم هەنگوینە دزیە، ئەی کە دزی بوو بۆ لێت خوارد، هەندێک جار باشترە کەواو سەڵتەکە نەکەیتە بەرت تا نەدرێتە چاوتا، جوامێری ئەوەیە چاکە نەبێتە منەت و نەوترێت، چەندین دۆست لەژیاندا جوامێریان دەرهەق نواندوم، نەمبیستوەبیڵێن، نایڵێن بەڵام هەیە بەجۆرێک جوامێری نواندوە، نەمتوانیوە وەک ڕێزێکی مرۆیی نێوان مرۆڤگەل ڕەتی کەمەوە دامناوە بەڵکو ڕۆژێ ڕەخسابۆی بگێڕمەوەو قانیع ئاسا سوپاسێکی بکەم.
جوامێری دەهۆڵ و زوڕنای نەگەرەک، ئەوانی دەینوێنن، ئەوانەن کە دەزانن لەوەی هەیانە و پەیدایان کردوە، خەڵکی تریش دەکرێت لێی سودمەند بن، کەریمی ئەلەکەکە دەرگای کەندوەکڵنی کردەوە بۆ هەژاران زانیتی ئەگەر ئەوی هەیەتی بەتەنێ بیخوات و خەڵکیش بەوجۆرەبن، لەزاریدا دەبێتە ژەهر، چونکە ویژدان و ئاکاری تا مردن ئازاری دەدەن بۆیە ئەوەی نەکرد، لەڕۆژگاری خۆیدا ڕەنگە زۆرێک خەڵک لەحاتەمی تائی زۆر تریان هەبوبێت، بەڵام لەبەر ئەوەی نەیانتوانی بەخشندەبن ناویان لەکولەکەی تەڕیشا نیە، ئەوەش حاتەمی تائی، ئەمە بۆ کەریمی عەلەکەش وەسایە، لەم ڕۆژانەی بەرێ لە سلێمانی لە تەکسیەک سەرکەوتم کە لێخوڕەکەی پیاوێکی هەفتا ساڵێک دەبوو، ئەو باسی دەوڵەمەندێکی ئاشنای خۆی بۆ کردم کە ڕەنگە پازدە بەس خانوی لەناو شاری سلێمانی و چەندین پڕۆژەی تری هەبێت، گوتی پەنجا ساڵە حەزدەکەم بەقاتێکی پۆشتەوە بیبینم نەمبینیوە، پەنجا ساڵە دەڵێی سڵقی ڕوتە، ئەو وتی جا توخوا ئیتر ئەو سەروەتە قیمەتی چیە.
جوامێری بریتیە لەجوانی مرۆڤ، زۆرن ئەوانەی ناتوانن جوان بن، بەپێچەوانەشەوە، هەیە بەگریانی مناڵێک ڕادەچەنێت، هەشە میلەتێک لەبرسا بمرێت باکی نیە، هەیە سەدان خێزانی میلەتەکەی، شارەکەی نانی شەوێکیان نیە، ئەویش لەخەمی ئەسپ و سەگ و پشیلەکەیدایەو مانگانە خواردنی سەدان هەژار دەدات بەئاژەڵە ئازیزەکانی.
فیلمێکی ئەمەریکی هەیە سەرەڕای ئەوەی یەکدووجارم بینیوە، بەڵام ناوەکەی نازانم کابرا بۆ ڕزگارکردنی مناڵەکەی کەپێویستی بەدڵێکە بەدکتۆرەکە دەڵێ دڵی خۆم دەبەخشم، دەست بەسەر نەخۆشخانەیەکدا دەگرێت، بەرپرسی پۆلیس لەئازارەکەی دەگات، لەهەزار لاوە باسی جوامێری و ناجوامێری دەکات، دواتر کوڕەکەیشی دەربازی دەبێت، جوامێری ئەوە نیە تۆ چوار قاتت هەبێت و دراوسێکەت قاتێکی پوختەی نەبێت، جوامێری ئەوەیە لانی کەم قاتێک بدەیتە دراوسێکەت، ژیان هاوبەشیو هەرەوەزی و هاوکاری یەکترکردنە، لەوە بترازێت ژیان شتێکی تر نیە.
