ئێوارەی رۆژی دووشەممە ١٨ ی ئەیلولی ٢٠٢٣، فرۆکەخانەی کشتوکاڵی عەربەت لەلایەن نەیارانی گەلەکەمانەوە کەوتە بەر بۆردومان و لەئەنجامدا ژمارەیەک قوربانی لێکەوتەوە .
هەر هەمان رۆژ، هەڤاڵ دەنیز جەودەت ئەندامی کۆنگرەی نەتەوەیی کورد لە نووسینگەی تایبەتی کۆنگرەی نەتەوەیی کورد( KNK لە شاری هەولێر تیرۆرکرا .
لەسەرەتا پرسە و سەرەخۆشی خۆمان بۆ خانەوادە و کەسوکار و هاوڕێیانی هەڤاڵ دەنیز و قوربانیانی هێرشەکە ڕادەگەیەنین و هیوای هەرچی زوو چاکبوونەوە بۆ بریندارەکان دەخوازین .
لەهەمانکاتدا بزووتنەوەی دیموکراتی گەلی کوردستان، ئەم کارە تیرۆریستی و تێکدەرانە بە توندی سەرکۆنە و شەرمەزار دەکات، ئەو کردەوانە تەنها تاوان و دەستدرێژی نییە بۆ سەر گیانی مرۆڤێکی سڤیل و هێزێکی دیاریکراو، بەڵکو دەستدرێژییە بۆ سەر ئەمن و ئاسایشی هەرێمی کوردستان.پێشمانوایە ئەم کردە و هێرشانە پیلانێکی بەرنامە بۆدارێژراوە لەسەر هەرێمەکەمان و گەلی کورد لەناوچەکە و ئەرکی هەموو هێز و لایەنە سیاسییە نیشتیمانییەکانە، رووبەرووی ئەو پیلانە نەگریسە ببێتەوە.
پێویستە حکومەتی عێراق سەروەری تەواوی خاکی عێراق بەهەرێمی کوردستانیشەوە بپارێزێت، هیچ لایەن و وڵاتێک ئاوا بەئاسانی نەتوانێت کردەی تیرۆری ئەنجام بدات و نائارامی لە هەرێمی کورسساتان بنێتەوە.
هەروەک چۆن پێویستە حکومەتی هەرێم و دەزگا ئەمنیەکانی شاری هەولێریش، تاوانباری کردەی تیرۆرکردنی هەڤاڵ دەنیز جەودەت بە زووترین کات بدۆزنەوە و بۆ ڕای گشتی ئاشکرا بکەن .
سەرشۆری و ریسوایی بۆ تیرۆریستان و نەخشەدارێژەران و ئەنجامدەرانی
درود بۆ گیانی قوربانیانی هێرشی فرۆکەخانەی عەربەت و هەڤاڵ دەنیز و هەموو قوربانییانی دەستی تیرۆر و تاوانکاری.
مەکتەبی سیاسیی
بزووتنەوەی دیموکراتی گەلی كوردستان
١٨\٩\٢٠٢٣
هەولێر