Table of Contents
بەڕێوەبەرایەتیی هاتوچۆی هەولێر 12 رێنمایی نوێی بۆ بەكارهێنانی رێگا خێراكان بڵاوكردەوە و بەگوێرەی بەشێك لە رێنماییەكانیش، گەڕانەوە بە بەگ و وەستان و چاوەڕێكردن لەرێگاوبانەكان قەدەغەیە و ناشبێت پیادەڕەوەان لەسەر شەقامی خێرا بپەڕنەوە.
بەڕێوەبەرایەتیی هاتوچۆی هەولێر لەڕاگەیەندراوێكدا بڵاویكردەوە، بۆ زیاتر گرەنتیكردنی سەلامەتیی هاوڵاتییان و شۆفێران، چەند ڕێنماییەكی پێویستی لەبارەی بەكارهێنانی ڕێگە خێراكان بۆ شۆفێر و هاوڵاتییان دیاریكردوە و داواش دەكات هەمو لایەكی پێیەوە پابەند بن.
ئەم كارانە لەسەر هێڵە خێراكان قەدەغە كراون:
یەك:
وەستان و چاوەڕێكردن بە بێ هۆكاری لەناكاو.
دو:
گەڕانەوە بە بەگ بە هەمو شێوەیەك.
سێ:
نابێت پیادەڕۆیان لەسەر شەقامی خێرا بپەڕنەوە، مەگەر پردەكان بەكار ببەن.
چوار:
كڕین و فرۆشتن و مامەڵە لەسەر شەقامە خێراكان.
پێنج:
ڕۆیشتنی ئەو سوارڕۆیانەی كە خێراییان لە 60 كیلۆمەتر لە كاتژمێرێكدا كەمترە.
شەش:
ڕۆیشتنی سوارڕۆكانی بیناسازی و كشتوكاڵی وەكو تراكتۆر و دەڕاسە و گرێدەر و شۆڤڵ و تەنانەت بۆ مەودای چەند مەترێكیش، بەڵكو دەبێت بە ئامێری هەڵگرتنی تایبەت بگوازرێنەوە.
حەوت:
پێچاوپێچكردن و تەڕناش و كێبڕكێ.
هەشت:
بەكارهێنانی مۆبایل و سۆشیالمیدیا.
نۆ:
پێچكردنەوە لە شوێنە تایبەتەكانی ئۆتۆمبێلی فریاگوزاریی خێرا یان هەر دەرچەیەكی دیكەی فریاگوزاری.
دە:
هەڵگرتن و دابەزاندنی سەرنشین.
یازدە:
لێدانی فوللایت.
دوازدە:
لێخوڕینی پایسكیل و مۆپید و سكۆتەر و ماتۆڕی سێتایە.