نوسینگەی رزگارکردنی رفێنراوانی ئێزیدی رایگەیاند، بەهۆی ھێرشەکانی داعشەوە بۆسەر قەزای شنگال دوو ھەزار و ٧٤٥ منداڵ بێ دایک و بێ باوک بوون. دەشڵێت، “تا ئێستا ٨٢ گۆڕی بەکۆمەڵ و دەیان گۆڕی تاکە کەسی لە قەزاکە دۆزراونەتەوە.”
بە گوێرەی ئامارەکە لە چوارچێوەی ھێرشەکانی رێکخراوی داعش بۆسەر قەزای شنگال لە ساڵی ٢٠١٤دا، ٦٨ مەزارگەی ئێزدی لەلایەن رێکخراوەکەوە تەقێندراونەتەوە.
ئاماژەی بەوەشداوە، شەش ھەزار و ٤١٧ کوردی ئێزدی لەلایەن رێکخراوی داعشەوە، رفێنرابوون کە سێ ھەزار و ٥٤٨یان کچن و دوو ھەزار و ٨٦٩ی دیکەیشیان کوڕن.
هاوکات، لەبارەی ژمارەی ئەو کەسانەی کە لەدەستی داعش رزگارکراون، ئامارەکە ئەوەشی خستووەتەڕوو، تا ئێستا سێ ھەزار و ٥٥٢ رفێنراوی ئێزدی لە دەستی داعش رزگاکراون کە ھەزار و ٢٠٧یان ژن و ٣٣٩یان پیاون، ھەزار و ٥٠یان کچن و ٩٥٦ دیکەیشیان کوڕن.
ئامارەکە ئەوەشی ئاشکرا کردووە، ١٤٦ رفێنراوی کوردی ئێزدی بەدەستی داعش کوژراون کە تەرمەکانیان دۆزراونەتەوە و تا ئێستاش دوو ھەزار و ٧١٩ رفێنراوی ئێزدی لەدەستی داعشدا ماون و رزگارنەکراون کە ھەزار و ٢٤٧یان ژن و ھەزار و ٤٤٥ی دیکەیشیان کوڕن.
