وەزارەتی کشتوکاڵی عێراق و هەرێم رایانگەیاند، تورکیا سەرقاڵی ئەنجامدانی رەفتاری دوژمنکارانەیە دژ بە ژینگە و سروشتی عێراق و هەرێم و مرۆڤایەتی و هەموو جیهان، چونکە ژینگە سنوری نییە.
هەردوو وەزارەتی کشتوکاڵی حکومەتی هەرێم و حکومەتی فیدڕاڵی بە هاوبەشی راگەیەنراوێکیان بڵاو کردەوە و تیایدا هاتووە، داوا لە دەسەڵاتدارانی تورکیادەکەن دەست هەڵگرێت لە بڕینی درەختەکانی دارستانەکانی ناوچە سنورییەکانی نێوان عێراق و تورکیا لە بادینان.
دەشڵێن، تورکیا سەرقاڵی ئەنجامدانی رەفتاری دوژمنکارانەیە دژ بە ژینگە و سروشتی عێراق و هەرێم ومرۆڤایەتی و هەموو جیهان، چونکە ژینگە سنوری نییە.
هاوکات، داوا لە حکومەتی تورکیا دەکەن بەپەلە رێوشوێنی پێویست بگرێتەبەر بۆ وەستاندنی ئەم رەفتارە.
بەگوێرەی راگەیەنراوەکە، حکومەتی عێراق و هەرێم، داوا لە نەتەوە یەکگرتووەکان و رێکخراوە نێودەوڵەتییەکان دەکەن هاوکاریانبن بۆ دۆزینەوەی رێگەچارەیەک بۆ کۆتایهێنان بەم کارە “نامرۆڤانە و نا بەرپرسانە” یە دژی ژینگە و هەوڵبدەن بۆ کۆتایی هێنان بە شێوەیەکی تەواوەتی.
پێشتریش، جوتیار عادل وتەبێژی حکومەتی هەرێم راگەیاندراوێکی بڵاوکردەوە و تیایدا هاتووە، بە فەرمی ئاگاداری حکومەتی تورکیایان کردووەتەوە بۆ کۆتاییهێنان بە بڕینەوەی دار لە ناوچە سنورییەکانی هەرێمدا.
