رۆژی پێنج شەممە رێكەوتی ٢٠١٧/١٠/١٢ ،شاندێكی باڵای یەكێتی نەتەوەیی دیموكراتی كوردستان كە پێكهاتبوو لە كاك غفور مخموری سكرتێری گشتی و فاخیر نانەكەلی ئەندامی مەكتەبی سیاسی یەكێتی نەتەوەیی دیموكراتی كوردستان سەردانی بارەگای مەکتەبی سیاسی بزووتنەوەی دیموکراتی گەلی کوردستانیان لە شاری هەولێر کرد و لەلایەن هاوڕێیان مام خدر سكرتێری گشتی بزووتنەوەی دیموکراتی گەلی کوردستان و هاوڕییان قهارمحمد و نهرۆ جلال ئەندامانی مەكتەبی سیاسی بە گەرمی پێشوازیان كرا .
لەکۆبوونەوەیەکدا بارودۆخی سیاسی کوردستان و عێراق و ناوچەکە باسی لێوەکرا هەردوولا دیدوبۆچوونی خۆیان لەمەڕ دوایین ئاڵوگۆرە سیاسی و ئابوری و کۆمەڵایەتیەکانی خستەڕوو بەتایبەت ئاڵوگۆڕە خێراکان و کاردانەوەکانی ناوەخۆیی و ناوچەیی و نێو دەوڵەتی دوایی ئەنجامدانی ڕیفراندۆم لەهەرێمی کوردستان و رۆڵی هێز و لایەنە سیاسیەکان لەم بارەیەوە تاوتوێ کرا .
لەبەشیکیتری کۆبوونەوەکەدا وەزعیەت و گوزەرانی خەڵک ودواکەوتن و کەمکردنەوەی مووچەی فەرمانبەران تاوتوێکرا و جەخت لەسەر ئەوە کرایەوە کە داهاتی ناوخۆ زیادی کردووە و نرخی نەوت تا ئاستێكی باش بەرز بۆتەوە بۆیە پێویستە حکومەت سیستەمی بەزۆری پاشەکەوتی مووچە لابەریت و خزمەتگوزارییە سەرەتاییەکان بۆ خەڵک دابین بکات ، لەکۆتاییدا جەخت لە پەیوەندی نێوان هەردوولا کرایەوە و وەفدی یەکێتی نەتەوەیی دیموکراتی گەلی کوردستان بە گەرمی بەڕێکران .