هەبونی ژیانێكی خۆشی هاوسەرگیری تەنها لە چیرۆكە خەیاڵییەكاندا بونی نییە، بەڵكو لە ژیانی راستەقینەشدا هەیە، ئەمەش لە راپرسییەكدا سەلمێنراوە.
تۆڕی هەواڵی CNN بڵاویكردوەتەوە، بە پێی لێكۆڵینەوەیەكی نوێ، ئەو كەسانەی پێگەیشتون و ژیانی هاوسەرگیرییان پێكهێناوە، زۆر دڵخۆشترن لەو كەسانەی لە هەر جۆرە پەیوەندییەكی دیكەدا هەن یان نین.
جۆناسن رۆسوێڵ، نوسەری ئەم لێكۆڵینەوەیە و ئابوریناسی سەرەكی كۆمپانیای گاڵۆپ دەڵێت، “بە هەر شێوەیەك ئەم زانیارییانە شی بكەینەوە، سودێكی تا ڕادەیەك گەورە و بەرچاوی هاوسەرگیری دەبینین لەڕووی چۆنیەتی هەڵسەنگاندنی خەڵكەوە”.
لە نێوان ساڵانی 2009 بۆ 2023، زیاتر لە 2.5 ملیۆن كەسانی پێگەیشتو پرسیاریان لێكرا لەبارەی ژیانی ئێستایان و داوایان لێدەكرا هەڵسەنگاندن بكەن لە نێوان پلەی 1 بۆ 10، كە پلەی چەند بە دڵخۆشییان دەدەن لە ماوەی 5 ساڵی ژیانیاندا.
بە پێی ئەنجامەكان ئەو كەسانەی هاوسەرگیرییان كردبو، پلەی بەرزیان بە ئاستی دڵخۆشی خۆیان دەدا بە بەراورد بەو كەسانەی هاوسەرگیرییان نەكردبو، بەڕێژەیەك %12 بۆ %24 جیاوازی ئاستی دڵخۆشییان هەبو.
ئەم جیاوازییە لە دڵخۆشی نێوان ژیانی هاوسەرگیری و ژیانی تەنهایی، بونی هەبو بە جیاوازی تەمەن، رەگەز، نەتەوە و خوێندن.
لەگەڵ ئەوەی زانیارییەكان و ئەنجامی لێكۆڵینەوەكە ئەوە نیشان دەدات ئەو كەسانەی هاوسەرگیریان كردوە دڵخۆشترن، بەڵام بەو واتایە نایەت هاوسەرگیری تاكە هۆكاری دڵخۆشی بێت، چونكە جۆرێتی ئەو هاوسەرگیرییە رۆڵ دەبینێت.
