چەندین گەلو نەتەوە لەرۆژهەلاتى ناوەراستو ئاسیا جەژنى نەورۆز بەجەژنى ساڵى تازە و بەهار دەزانن، بەڵام نەورۆز بۆ ئێمەى کورد سەرباری ئەو جەژنانە، سمبولی یەکێتى و بەرخودان و راپەڕینو سەرکەوتنە. هەرچەندە ئەمساڵ مرۆڤایەتی لەسەرتاسەری جیهان لەگەڵ گرفتێکی ترسناک رووبەرووە، هەرەشە لەبوونو مانەوەی دەکات، کە ئەویش کێشەی هەرە مەترسیداری ڤایرۆسی کۆڕۆنایە، کە چەندین کێشەی تەندورستی و ئابووریو کۆمەڵایەتی بۆ سەرتاسەری جیهان دروست کردووە، کە بێگومان کاریگەری راستەوخۆی لەسەر گەلى ئێمەدا هەیە، سەرباری ئەو گرفتەش، گەلی کوردستان لەدۆخێکی واهەستیار و ناسک پێشوازى لەنەورۆزو سەری ساڵی (2720) کوردى دەکات. بەداخەوە گەلى ئێمە، لە کوردستانى (رۆژهەلات، رۆژئاوا، باکور) ئەم نەورۆزەش جەژن لەبندەستیدا دەکەنەوەو بەهۆی هێرشو داگیرکاری دڕندەیی دوژمنان لە مافە نەتەویى و دیموکراتیەکانیان بێ بەشن. رژێمى کۆمارى ئیسلامى ئیران، ئەمرۆش وەلامى داخوازەکانى کوردان و نەتەوەکانى تر بە تانک و تۆپ و لەسێدارەدانى سەدان کوڕو کچی خەباتکارو تێکۆشەر دەداتەوە. لە رۆژئاواى کوردستان، گەلى ئێمە لە هەڵومەرجێکى دژواردا پێشوازى لەنەورۆز دەکات. دەوڵەتى تورک بەبەرچاوى کۆمەڵگای نێودەوڵەتیو بەهاوکارى (ئەمریکا، روسیا) لەهێرش کردنو داگیرکاری سەر ئەم بەشەى وڵاتى ئێمە بەردەوامەو گەلێک ناوچەشی داگیرکردوە، لەو دۆخەشدا بەداخەوە هێزە کوردستانیەکان خاوەن یەک هەڵوێست نین.
هەرچەندە باشوورى کوردستان لەچاو بەشەکانی دیکە بارودۆخی جێگیرەو ئەمرواقعێکی دەستووری لەناو دەوڵەتی عیراق هەیە، بەڵام هەرێمى کوردستانیش لەگەل کۆمەلێک کێشە رووبەڕووە، هەول و پلانی داگیرکەران بۆتێکدانى ئەزموونى باشوورى کوردستان بەردەوامە. لە جەژنی نەورۆز سەرباری پیرۆزبایی لە هەموو گەلی کوردو هێزو لایەنە سیاسیەکان، داوا لە پارتەكانی باشوور دەكەین، پاراستن و گەشەكردنی دەستكەوتەكانی باشوور پێویستی بە پێداچونەوە بەكاروانی تێكۆشانی ساڵانی ڕابووردوو ھەیە، بەجۆرێك كارەكانی حكومەتی ھەرێم لەئاست داخوازییەكانی خەڵكی كوردستانی باشوور لەدابین كردنی عەداڵەتی كۆمەڵایەتیو ئەنجامدانی چاكسازی ڕاستەقینە بێت. رەوشى باکوورى کوردستان لە پارچەکانى تر باشتر نییە، سیاسەتى دەوڵەتى تورک لەبەرامبەر گەلى ئێمە نەگوراوە، دەوڵەتى تورک گوێ ناداتە داخوازى هێزە ئاشتیخوازو دیموکراتو مەدەنییەکان، هەر وەکو جاران وەڵامى داخوازیە نەتەوەیى و دیموکراتیەکانی گەلى کورد بە ئاگرو ئاسن دەداتەوە، ئۆپەراسیۆنى سەربازیو سیاسەتى ملیتاریکردنى کوردستان بەردەوامە، بەئەوەندەش نەوەستاوە، بەبێ گۆێدانە هیچ یاساو رێسایەکی نێودەوڵەتی رۆژانە هەرەشە لەباشوورو رۆژئاواى کوردستان دەکات. بەداگیرکردنى عەفرین و سەرێکانى دڵی ئاوی نەخواردۆتەوە تەنانەت ئەگەر بۆی بلوێ هەموو رۆژئاواى کوردستان داگیردەکات.
گەلى ئێمە لە سەرتاسەرى کوردستان سەرەراى زۆرى و ستەم و ئاستەنگەکان لەبەرخوەدان و خەباتی سیاسیو مەدەنیو جڤاکی بەردەوامە، ئێستاش مەترسى گەورە لەبەردەم خەباتى ئازادیخوازى گەلەکەماندا هەیە، بۆیە ئێمە لە یادی نەورۆزدا جارێکی دیکە داوا لەهێزو لایەنە وڵاتپارێزەکانی کوردستان دەکەین، لەو پێناوەدا سوود لەهەموو دەرفەتەکانی لێکنزیک بوونەوە وەربگرن، تاکو خەباتو تێکۆشانی گەلەکەمان دەگاتە ئامانج ، وەرن با لەنەورۆزى (2720) لەپێناو ئازادى وڵات و بەختەوەرى گەلەکەمان، دەست لەناو دەست بنێن، لە بەرامبەر زوڵم و زوردارى پەرە بەخەباتو بەرخودان بدەین. لە جەژنی نەورۆزدا، داوا لەپارتەکانى باشوور دەکەین، لەپێناو پاراستن و گەشەکردنى دەستکەوتەکانى هەرێمی کوردستان، لەپێناو دەستکەوتی زیاتر کارو کارنامەیان لەیەکتر نزیک بکەنەوە. هەر لەو جەژنەدا جارێکی دیکە پشتگیری خۆمان بو بەرخودانى گەلەکەمان لە رۆژهەڵات رادەگەیەنین و ئاواتەخوازین هێزو لایەنەکان پەرە بەکارو تێکۆشانی هاوبەش بدەن. داواش لەهەموو هێزەکانى رۆژئاواى کوردستان دەکەین، لەسەر پرانسیپەکانى کاری هاوبەشو بەسەرچاوە گرتن لە بەرژەوەندی باڵای نەتەوەییو نیشتمانیو لەپێناو مسۆگەرکردنى ئامانجەکانى گەل هاوکارى یەکتر بن. داوا لە هێزو پارتو لایەنى سیاسیەکانی باکوورى کوردستان دەکەین، لەبەرامبەر دەستدرێژیەکانی دەوڵەت دەست لەناو دەست بنێنو لەپێناو ئازادىو سەربەستى پێکەوە کارو خەباتى هاوبەش بکەن. دووبارە جەژنى نەورۆز لە تێکوشەران، لە زیندانیانى سیاسی، لە دایکى شەهیدان، لەگەلى کوردستان پیرۆز بیت.
ئادارى 2720
حزبى شیوعى کوردستان- عیراق
حزبى سوشالیستى کوردستان-باکوور
پارتى کومونیستى کوردستان–رۆژئاوا
پارتى کومونیسستى کوردستان-باکوور
حزبى زەحمەتکێشانى کوردستان- باشوور
كۆمەڵەی شۆرشگێڕی زەحمەتكێشانی كوردستانی ئێران
بزوتنەوەى دیموکراتى گەلى كوردستان