له‌راپۆرتێكی هه‌فته‌نامه‌ی ئاوێنه‌دا به‌رپرسی په‌یوه‌ندییه‌كانی نه‌خۆشخانه‌ی هیوا له‌سلێمانی رایده‌گه‌یه‌نێت له‌ساڵی 2007وه كه نه‌خۆشخانه‌كه كراوه‌ته‌وه نزیكه‌ی 25 هه‌زار كه‌س له‌نه‌خۆشخانه‌كه‌یان فایلی بۆ كراوه‌ته‌وه‌و نزیكه‌ی 17 هه‌زاریان شێرپه‌نجه‌ی هه‌بوه.
هه‌ر به‌وته‌ی به‌رپرسانی نه‌خۆشخانه‌كه ساڵانه 2000 هه‌زار حاڵه‌تی نوێی شێرپه‌نجه تۆمار ده‌كرێت، به‌ڵام ئه‌و ژماره‌یه خه‌ڵكی زۆربه‌ی شاره‌كانی دیكه‌ی كوردستان‌و عیراقی تێدایه.
به‌رپرسی په‌یوه‌ندییه‌كانی نه‌خۆشخانه‌ی هیوا سیامه‌ند خه‌لیل له‌لێدوانێكدا بۆ ئاوێنه وتویه‌تی “سروشتی نه‌خۆشی شێرپه‌نجه ئه‌وه‌یه، كه به‌شێوه‌یه‌كی گشتی نه‌خۆشییه‌كی بێڕه‌حمه، نه‌ك له‌روی ده‌رونییه‌وه، به‌ڵكو له‌روی خه‌رجیشه‌وه‌جا ئه‌گه‌ر له‌ئه‌ستۆی نه‌خۆش بێت یان حكومه‌ت”.
ئه‌و به‌رپرسه‌ی نه‌خۆشخانه‌ی هیوا باس له‌وه‌ده‌كات كه خه‌رجییه‌كان له‌سه‌ر حكومه‌ت بوه، به‌ڵام له‌گه‌ڵ هاتنی قه‌یرانی دارایی ئێستا ئێمه له‌لێواری مه‌ترسیداین.
