ڕێکخراوی چاودێری مافی مرۆڤ ڕایگەیاند، هێزە ئەمنییەکانی هەرێمی کوردستان خۆپیشاندانەکانی مانگی ڕابردوویان سەرکوت کردووە و لە خۆپیشاندانەکانیشدا زیاتر لە ٨٨ کەس دەستگیر کراون.
هیومەن ڕایتس وۆچ لە دوایین ڕاپۆرتی خۆیدا بڵاویکردەوە، “لە خۆپیشاندانەکانی مانگی ئازاری ڕابردوودا، هێزە ئەمنییەکانی هەرێمی کوردستان لانیکەم ٨٤ خۆپیشاندەر و ٤ رۆژنامەنووسیان دەستگیر کردووە”.
ئاماژەی بەوەش کردووە زۆربەی دەستگیرکراوەکان بە بڕیارێکی تاکلایەنە و بەهۆی بەشداریکردنیان لە گردبوونەوەیەکی ئاشتیانە و لەسەر داواکردنی مافی ڕەوای خۆیان دەستبەسەر کراون.
هیومەن ڕایتس وۆچ لە زاری ١٢ شایەتحاڵەوە بڵاویکردەووەتەوە, لە شارەکانی هەولێر و دهۆک و ئاکرێ، زۆربەی ئەوە کەسانەی دەستگیر کراون لەلایەن هێزە ئەمنییەکانەوە هێرشیانکراوەتەسەر و لێیاندراوە.
ئەوەشی خستووەتەڕوو لە چەندین شاری دیکەوە وەک شیلادزێ و زاخۆ و سۆران ڕاپۆرتیان بەدەستگەیشتووە سەبارەت بە دەستگیرکردنی خۆپیشاندەران.
جێی ئاماژەیە ٢٥ی مانگی ڕابردوو و بە مەبەستی ناڕەزایەتی دەربڕین دژ بە سیستمی پاشەکەوتی موچە ، مامۆستایان و تەندروستکاران و فەرمانبەران لە سەرتاسەری هەرێمی کوردستان خۆپیشاندانیان ئەنجامدا کە لە هەندێک شوێن بەهۆی ڕێگری هێزە ئەمنییەکان گرژی دروستبوو و بەوهۆیەشەوە ژمارەیەک هاوڵاتی لە خۆپیشاندەر و رۆژنامەنووس بریندار بوون.
لە هەولێر و چەند شوێنێکی دیکەش ژمارەیەک کەس بە جلی مەدەنییەوە کە بە وتەی هاوڵاتیان و شایەتحاڵان سەر بە لایەنێکی دیاریکراو بوون، هێرشیانکردە سەر مامۆستایان و خۆپیشاندەران و سوکایەتییان پێکردن و تا ئێستاش هێرشبەران لێپێچینەوەیان لەگەڵدا نەکراوە و سزا نەدراون.